Minister Presidente cu update covid: - *10 enfermero y dos intensivista di Hulanda lo ta na Aruba dentro di poco
ORANJESTAD (AAN) – Minister Presidente, mr. Evelyn Wever-Croes, a bin cu un update tocante e situacion di covid-19 den nos pais.
E mandatario a indica cu e cifranan di casonan nobo, cada dia por mira cu den un average di siete dia, ta cuminza baha, cual ta un bon señal.
“Awe claro, nos tin hopi mas caso cu normal, pasobra bo ta haya hende cu a bay test ayera cu no por a bay test den fin di siman, y semper e dianan Diamars y Diaranzon, bo ta haya un peak den un siman, pero e peak ta mas abao cu e simannan prome cu awo. Esaki ta duna bo un bon indicacion. E indicacion positivo ta tambe cu hendenan ta test y esey kiermen cu nos ta ripara cu manera un hende tin un sintoma ta bay test y esey ta algo positivo, pasobra bo por gare y stop’e mesora”, Prome Minister a indica.
El a menciona cu tambe por mira cu e cantidad di personanan interna na Hospital a cuminza baha, y esey tambe ta algo hopi importante.
“Lamentablemente den intensive care si e situacion ta keda hopi, hopi tenso, y nos tin como 15 pashent na Colombia den ICU ayanan y aki nos ICU ta yen tambe”, e mandatario a subraya, agregando cu: “E situacion ta mustrando cu poco, poco nos ta bayendo den e direccion corecto, den cual ta baha e presion di nos cuido medico. Nos no teynan ainda; tin ainda e limitacion den nos Intensive Care”, e mandatario a acentua.
Otro bon noticia ta cu gobierno a haya e aprobacion di Hulanda pa expansion di personal, y den e siguiente dia y oranan lo bin diez enfermero specializa y dos intensivista cu ta biniendo pa yuda hospital y baha e presion di e coleganan cu ta laborando den Aruba su Hospital.
