Banco Central a presenta nan plan strategico 2026-2030 na su stakeholdernan

Tambe estudio economico...

ORANJESTAD (AAN): Banco Central di Aruba (BCA) a presenta su plan strategico 2026-2030, pronostico y estudio economico mas recien durante su Business Days 2026. E evento a tuma luga den cuadro di e celebracionnan di e 40 añanan di Banco Central.

   E Business Days, cu e tema “Liderando cu ekidad, ancra den futuro” (Leading with Equity, Anchored in the Future) a tuma luga riba 19 y 20 di augustus y tabata dirigi na stakeholder di e sector financiero, gobierno y organizacion den sector publico.

   Thomas Domhoff, kende a asumi e cargo di Presidente di BCA riba prome di juli 2026, a percura pa e discurso di apertura durante tur dos sesion y a introduci su mes formalmente na e stakeholdernan clave.

Melanie Croes, Manager Strategy & Projects, a presenta e plan strategico di BCA pa 2026-2030, titula Ancra den Futuro. E plan ta basa riba e tres pilarnan di Banco Central y ta fiha cuatro punto di prioridad pa e añanan binidero: digitalisacion, dato, envolvimento cu stakeholder y preparacion pa reto, incluyendo menaza cibernetico y cambio climatico. E prioridadnan aki ta refleha e esfuerso continuo di BCA pa mantene e panorama financiero di Aruba resiliente.

   Dr. Ryan Marapin, economista na Banco Central, a comparti algun detayes di e publicacion di Economic Outlook di BCA, cual lo keda publica pronto. Su presentacion a cubri e pronosticonan pa e resto di 2026 y loke ta bin despues.

   Por ultimo, e departamento di Research & Economic Policy di Banco Central, a presenta e edicion mas reciente di Governing from the Future, cual ta contene shete estudio tocante e retonan economico y di maneho cu ta spera di por afecta Aruba den e siguiente dies pa diescinco añanan. E economistanan Giantcarlo Croes, Elmelynn Croes, Daniella van den Berg y Rynall Kock a tene e presentacionnan aki.

E “Plan strategico 2026-2030” y e “Governing from the Future, Leading with Equity” ta disponibel a traves di www.cbaruba.org.