Minister Mervin Wyatt-Ras
ORANJESTAD (AAN): Durante e 'Kick Off' di e tercer edicion di e trayecto “In The Picture”,
Minister Mervin Wyatt-Ras a indica cu ta hopi importante pa duna personanan cu ta bibando den un bijstand, e oportunidad pa haya e instrumentonan y e sosten pa asina nan por ta bek den e mercado laboral.
E trayecto “In The Picture” ta hopi importante pa comunidad y a haya sosten di CEDE Aruba, Departamento di Asuntonan Social, Departamento di Progreso Laboral (DPL), como tambe varios profesionalnan.
E Minister a splica cu hopi biaha esnan cu ta riba bijstand ta wordo critica, sin sa e condicionnan di bida di e persona. Hopi biaha nan no ta haya e mesun un oportunidadnan cu e generacionnan anterior. Awendia hende ta struggle y hasta give up pasobra nan mester balansa nan obligacionnan familiar cu trabao. Kinderopvang ta super importante y e ta spera cu e sosten di e profesionalnan di e programa, esaki por yuda nan y ta un alivio tambe.
Wyatt-Ras a recorda cu e di dos edicion di trayecto “In The Picture” un cantidad di 37.5 porciento a logra di haya trabao, cu ta nifica cu di 32 persona, 12 a haya trabao, y e ta kere cu esaki ta indica cu e programa ta sumamente exitoso. E ta spera cu e porcentahe sigui subi.
Minister a enfatisa cu comunidad mester ta conciente cu bida ta duro, pero si un persona ta pusha y duna di su mes, na momento di logra, e yiunan y famianan ta considera bo un ehempel pa otronan por sigui.
Tur hende por ta parti di mercado laboral, pero Minister ta reconoce cu tin biaha pa hende di cierto edad, esaki ta un poco mas dificil pa drenta mercado laboral, pasobra companianan ta prefera di tuma un persona mas hoben cu un di 50 aña bay ariba. Nan ta trahando cu DPL por haci posibel pa dunadonan di trabao por ta mas habri pa duna trabao y tin un cierto 'pasenshi' cu trahadonan. No tur trahado ta mescos. Tin cu tin hopi motivacion, pero tin cu por ta pasando cierto situacion na cas y den opinion di Minister, mester tin e pasenshi y tolerancia pa e trahadonan aki.
Minister Mervin Wyatt-Ras a felicita Jalken Antonia di Fundacion Ja Ik Aruba pa e proyecto, cu semper ta motiva tur hende, como tambe tur profesionalnan cu ta dedica na esaki. E tambe ta gradici tur stakeholders y ta spera di por sigui conta cu nan sosten den tipo di proyectonan asina.
