Un estado di derecho democratico solamente por funciona cu un prensa liber

Durante brindis cu prensa:

ORANJESTAD (AAN): Den cuadro di Dia di Prensa, e asociacion RAPP (Red Arubiano di Prensa Profesional) conhuntamente cu Vertegenwoordiging van Nederland in Oranjestad VNO, a tene un brindis. Vincent Storimans kende ta representante di Hulanda na Aruba, a bisa cu e ta contento di mira cu diferente instancia na Aruba a para keto na e Dia di Prensa y e trabao cu periodistanan ta eherce ya cu un estado di derecho democratico solamente por funciona cu un prensa liber, independiente y critico cu ta controla e podernan na un forma profesional.

   Ya ta dos aña cu RAPP a wordo funda cu e meta pa uni prensa y enforsa desaroyo di e periodistanan. E trabao di prensa ta importante y VNO ta sostene RAPP den su meta pa sigui uni y profesionalisa periodistanan por medio di training y otro formanan di educacion.

   Melissa Stamper kende ta presidente y un di e fundadornan di RAPP, a gradici VNO pa a organiza e brindis conhuntamente cu RAPP y alavez tambe pa nan sosten di momento cu a funda RAPP na 2024. Pa RAPP ta importante pa prensa por organiza su mes como profesionalnan.

   Alavez Stamper a menciona cu en conexion cu Dia di Prensa RAPP ta organizando pa di tres bes e Caribbean Journalism Seminar di cual e topico lo ta ‘AI & Innovations’. E oradornan international lo papia riba AI & Ethics, Vibe Coding in the Newsroom y Claude for Journalists. E workshopnan lo ta over AI Essentials for Journalists y Vibe Coding in practice. Entrada ta gratis pa tur periodista y nan lo por atende e workshopnan tambe.

   Na mes momento no por keda sin menciona cu RAPP ta bay estrena su Podcast ‘Prensa den Close Up’ den henter luna di September via medionan social.