Ban evita di tira sushi den rooi y Dam pa no contamina awa pa cunukeronan

ORANJESTAD (AAN): E lunanan prome y na comienzo di temporada di Horcan, ta uno caminda semper e personal di Santa Rosa riba caya, ta pasa controla tur Dam rond di e isla, y ta haci nan limpi.

   Cu e limpieza aki, ta referi na snoeimento di matanan, ta recoge sushi, y evita blokeo y material innecesario benta den nan.

   Den un entrevista di Nathalie Maduro, kende ta director di Santa Rosa, el a splica cu e aña aki a bin nota cu hopi Dam no por a haci nan bom (fundeshi) limpi, debi cu tin hopi lodo.  Si heavy equipment bay eynan, e ta chok y pega den dje y esey lo bira un otro problema cu mas gasto pa sak’e bek.

   Loke Santa Rosa a bin constata, cu hendenan no ta tira sushi directamente den e Damnan.  Pero mas bien nan ta bentanan den rooinan, y ora cu un tiki awa yobe e rooi ta trece e sushedad den Dam.

   Sushedad den rooi ta stroba e fluho di awa, y tin chens cu e ta bay finaliza den Dam.

   Pa 2023 ta premira cu lo bay tin basta yobida, y pesey Santa Rosa ta actuando rapido pa finaliza limpieza di e Damnan.  Pero toch tin un otro situacion tiki dificil, como cu Santa Rosa tin solamente un vehiculo di Heavy Equipment, siendo cu nan tin hopi peticion pa yuda cu servicio den terenonan di cunucu.

   Pesey Santa Rosa lo bay acerca DOW pa purba di haya cooperacion mescos cu a yega di socede den pasado.  Pa check si por pone heavy equipment disponible pa yuda saca lodo, cu DOW lo bay warda na Gabilan pa asina use ora cu tin mester.

   Santa Rosa ta nota cu hopi sushi cu ta aglomera den Dam ta di material di plastico, incluyendo hopi boter di plastico.  Corda cu ora di planta, semper bo por recicla e tipo di boternan aki, y awendia tin hopi scol cu nan hofi, y aki nan por usa nan na forma util pa yuda nan cultivo.

   Corda cu awa di Dam ta wordo usa pa cultivo di mata, pero tambe pa bestianan haya pa bebe na criaderonan.  Na momento cu e awa aki wordo contamina, e ta un peligro pa e calidad di carni di bestia, pero tambe cu tin biaha ta haya ordo cu ora e awa ta hopi contamina, nan no ta ni usa e awa mas pa cunukeronan.  Full un Dam yen di awa perdi por nada.  No tira sushi ni nada contamina mas den dam!