Presidente di FTA Hose Figaroa a representa Aruba den e Congreso di ILO:
ORANJESTAD (AAN) – Presidente di e Federacion di Trahadornan di Aruba (FTA), mr. Hose Figaroa, a representa Aruba den e Congreso di International Labor Organization (ILO), como parti di e Reino Hulandes.
E Congreso aki a tuma lugar dos siman pasa, unda diferente tema di nivel mas halto a wordo trata. Ta temanan cu tin di haber cu e principionan di e mundo di labor, cu riba su mes tabata un experiencia hopi interesante pa FTA, pa wak kico ta e problemanan cu tin internacionalmente riba tereno laboral.
“Pero tambe ta interesante den sentido cu tin cierto cosnan cu ta relata, basta directo, cu e situacion na Aruba. Un di nan y esun cu FTA a scoge pa participa na dje, durante di e Congreso aki, tabata e situacion di e mercado laboral”, Hose Figaroa a indica.
El agrega cu pa adapta na e necesidadnan cu bo tin riba e mercado, den esaki tabata tin un grupo cu a trata e guianan pa e programa di “apprenticeship”, cual na opinion di FTA esaki ta algo interesante pa Aruba. El a splica cu esaki ta un sistema unda e persona ta traha y alavez ta siña y ta cualifica su mes miho pa e tipo di trabao cu e ta haci.
“Den esaki, ILO ta bay saca un recomendacion, no ta bay ta un tratado directo, pero un regla cu ta bay duna bo cierto puntonan cu mester tene cuenta na dje como pais, den bo regulacionnan, den bo leynan, pa asina por proteha e posicion legal di e hendenan cu ta participa den e programa di ‘Apprenticeship’. Riba su mes, e ta algo hopi interesante pa nos, pasobra un di e kehonan cu nos ta sinti hopi for di e dunadornan di trabao, sigur pa loke ta trata e sector turistico di Aruba, cu ta e sector di mas grandi, ta cu tin mal conexion entre loke ta educacion cu e trahador ta ricibi, sigur e generacion nobo cu ta esun mas jong, y e momento cu mester eherce e trabao cu tin riba mercado”, Presidente di FTA a señala.
Figaroa a subraya cu un di e maneranan di coregi esaki ta via programanan di aprendizahe y pesey FTA a scoge pa sigui e programa ey na ILO, loke ta hopi interesante pasobra nan por a wak con otro paisnan ta deal cu e situacionnan aki, y ki solucionnan nan a mira pa loke ta trata, specificamente, e proteccion di e trahado na momento cu e ta sigui e programa di aprendizahe.
