WILLEMSTAD: Entrante Diasabra 1 di Juli 2023, tur persona of negoshi na Curaçao por cuminza importa atrobe tur producto for di Venezuela, mescos tabata e caso prome cu e ceramento di frontera na Februari 2019.
Conseho di Ministro na Curaçao a bay di acuerdo cu e peticion aki di Ministro di Desaroyo Economico, Ruisandro Cijntje.
E decision ta valido pa importacion maritimo como tambe aereo. E cantidad di dia cu un barco di Venezuela por keda mara na waf di Curaçao, ta subi awor for di 2 dia, pa un maximo di 4 dia, sinembargo tin di proba cu 2 dia no ta suficiente pa stiwa y descarga e cargamento.
Ministro ta indica cu ta importante y necesario pa sigui stimula actividadnan di comercio cu Venezuela, mirando e desaroyonan despues cu poco-poco a habri fronteranan atrobe entre e paisnan. Economianan chikito manera esun di Curaçao ta sumamente vulnerable.
Barconan por importa tur producto atrobe for di Venezuela sin restriccion, cu excepcion di e productonan prohibi manera e.o. oro, webo di galiña, y cierto fruta y berdura. Na e waf di Curaçao unda publico por yega y cumpra direct for di nan, e barconan aki por bende solamente pisca, fruta, berdura, y 8 producto adicional cu ta sucu klenku, azeta di coco, azeta di awacati, rucu, cumino, clabo dushi, blachi pa ayaca, y hilo pa mara ayaca.
