‘Ban den Caya’ ta trece bida nobo den centro di ciudad y uni turismo cu comunidad

Ministro Wendrick Cicilia:

ORANJESTAD (AAN): Diaranson mainta, Minister di Turismo, Transporte y Labor, mr. Wendrick Cicilia, a anuncia e lansamento oficial di e evento cultural semanal “Ban den Caya”, un iniciativa pa revitalisa Caya Grandi y celebra nos cultura y identidad nacional.

   E proyecto ta un colaboracion entre Ministerio di Turismo, Ministerio di Economia, Ministerio di Asunto General, ATA y otro stakeholdernan.

   Minister Wendrick Cicilia a splica di ta mira e balor pa trece comunidad y turismo hunto den un actividad den cual ta celebra nos cultura y laga nan experencia kico realmente ta haci Aruba unico. Hunto cu Aruba Tourism Authority, lo haci esfuerso pa trece turistanan den caya e anochi aki pa experencia nos cultura y autenticidad a traves di aspectonan culinario, artistico y expresion musical y crea un ambiente vibrante y positivo den Caya Grandi. E evento ta pa crea sinergia entre turistanan y localnan den un celebracion di e cultura y tradicion Arubano. Nos localnan por expone e turistanan na e costumbernan di nos pueblo, nos musica vibrante y ambiente autentico Arubano, y tin e oportunidad pa haci compras durante e anochi di celebracion.

   E evento lo inicia diabierna 6 di juni 2025 y lo tuma luga tur diabierna entre 7’or y 10’or di anochi y lo termina 29 di augustus, cubriendo un total di 13 edicion. Lo tin presentacion di musica en bibo, danza folklorico, teatro den caya, arte di palabra, un mercado di arte y artesania, zona culinario cu food trucks y street food, y espacio pa mucha cu actividad educativo.

E sitionan clave ta inclui Plaza Daniel Leo, Plaza La Linda (food court/stage principal) y Plaza Nikki Habibe.

Prome Minister Mike Eman y Minister di Economia Geoffrey Wever a expresa nan apoyo pa e vision, cual ta forma parti di un strategia mas amplio pa revitalisa Oranjestad y duna bida nobo na nos centro di ciudad.

“Ban den Caya” ta mas cu un evento, ta un movimiento pa reconecta cu nos herencia y lansa un Aruba culturalmente fuerte y economicamente vibrante