Directora Reclassering Seraida Pemberton:
ORANJESTAD (AAN) – Directora di Reclassering, Señora Seraida Pemberton-Leonard, den entrevista cu DIARIO a comenta cu di 2024 pa 2025, por keda wak un desaroyo bao nos hobennan unda cu e cantidad di hobennan cu ta drenta den contacto cu husticia, ta aumenta.
El a agrega cu Reclassering a cuminza cu “half project” na 2023, cu ta un proyecto piloto cu na 2024 a wordo lanza den grandi, pero hopi di nan tambe ta cometiendo delitonan leve, y nan ta bin mas den “build”. Anto, e totalidad ta mustra cu esaki ta un cantidad basta halto di hobennan.
Na Reclassering Aruba a introduci un programa, cu ta existi na Hulanda caba, unda e hobennan cu ta comete un delito relativamente leve, ta bin na remarca pa e proyecto aki den cual nan ta haya guia pa un periodo di cuater luna, y si nan cumpli cu e trayecto positivamente, nan caso no ta yega Ministerio Publico.
Segun señora Pemberton esaki ta sumamente bon, pasobra e hobennan por haci un fout, y si ta un delito leve nan por haya un otro oportunidad.
Reclassering a bin cu ne pasobra ora cu un hoben ta cay pa un delito pisa, ora tin combersacion cu nan, nan ta declara cu ya caba nan a bin den contacto cu husticia, pa delitonan mas leve.
“Anto p’esey tambe Reclassering a dicidi di tuma un stap pa bay un tiki mas preventivo p’asina takel e hobennan aki pa nan no sigui den mal caminda, pa comete delitonan mas pisa”, directora Pemberton a splica.
Antes, ora un hoben comete un delito leve, ta wordo manda cas y e caso ta keda t’eynan. “Pero aworaki, na momento cu e hoben comete e delito, leve ey, reclassering ta takel, y e hoben ta wordo referi na Jeugd en Zedenpolitie (JZP), nan ta bin cerca nos y nos ta duna nan un guia. Naturalmente, nan y nan mayornan mester ta habri pa cu esey” señora Pemberton a indica. El a agreba cu p’esey ta hopi importante pa e mayornan sa tambe di e programa pa motiva e hobennan pa cab’e, y no cu pa un delito asina leve e caso bay Ministerio Publico, of sin cu a acerca e hoben e ta sigui den e mesun caminda.
E programa ta enfoca riba tuma responsabilidad pa locual cu a haci, pero haci bon di drecha locual el a daña.
