Disturbio na nivelnan mas halto ta dicidi pa Tammy y tempo Aruba
*Laman bruto a anticipa su presencia na entrada di region di Caribe
ORANJESTAD(AAN)—Alarma di horcan a wordo bati atrobe ayera den Caribe.
Un disturbio na e nivelnan mas halto di atmosfera a dicidi pa ruta di un un depresion, cu a bira tormenta pa rapidamente bira Tammy, a sigui pero tambe pa e tempo cu for di awe Aruba por conoce.
Pa keda un rato na e loke por spera na Aruba, informacionnan ta mustra riba e presencia di un asina yama through, un sistema di aire friu cu ta uno di e elementonan cu ta dicidi pa e existencia y ruta di sistemanan tropical cayente.
Mientras pa Aruba for di ayera a papia di presencia di e disturbio na nivelnan mas halto, pa otro partinan di region di Caribe, Tammy a bira e noticia principal.
Den porta di Caribe, un sistema tropical a desaroya rapidamente.
Tammy tabata e nomber cu a duna e sistema nobo, cu a sigui e rumbo cu diferente tropical a sigui na 2023, cu ta e direccion West Noord West, dirigi pa sistemanan di aire friu entre otro y afectando e situacion na islanan situa na entrada di region di Caribe.
DIARIO manera semper tabata den contacto cu miembronan di comunidad di paisnan cu ta forma e cadena di isla na entrada di region di Caribe cu tabata riba e ruta Noord West cu National Hurricane Center a proyecta pa Tammy.
E sistema tabata duna tur indicacion te cu ayera tardi na ciere di e edicion aki, cu e lo por a pasa riba of den vecindario directo di eislanan.
For di tempran imagennan y informacionnan a cuminsa drenta ayera y DIARIO paso a paso a sigui relatonan di e furia di Tammy cu ya den horanan di merdia a bati na costa di e islanan.
Portret por mustra e momento cu ayeramerdia, ora ya alarma a wordo bati na Sint Maarten pa horcan, e beach cu mester tabata parti di e portret a desaparece bou di olanan.
Yobida pisa cu ta causa inundacion pero tambe derumbe peligroso, tabata e amenaza pa cual a prepara poblacionnan di e islanan na entrada di region di Caribe.
E hecho cu na 2023 na mas cu un ocasion sistemanan tropical a bira amenaza cu no a bira realidad, tabata uno di e peligernan grandi cu autoridad tabata visualisa.
Sinembargo, durante e dos ultimo dianan poblacionnan di e islanan tabata na careda pa prepara pa e desastre cu e sistema cu tabata bira mas fuerte, lo a laga atras.
2023 mester tabata un aña di El Niño, pues trankil manera originalmente a wordo pronostica.
Efectonan di cambio di clima, provoca pa hende, a aumenta e cantidad di sistemanan cu tabata debilita pero bolbe crece despues di a causa tragedia na cantidad di lugar cu nan a afecta.
Region di Caribe ayera tabata sigui e peliger cu e horcan tabata forma pa paisnan cu ta mira nan bida, nan economia, nan bienestar na peliger.
Na careda hendenan a cuminsa ta prepara pa yegada di e furia di horcan cu no ta haya atencion cu e merece pasobra e gueranan na mundo, a bira mas cruel cu e horcannan mes.
October ta un luna cu Aruba mester tene na consideracion pa loke ta trata condicionnan di tempo cu por causa problema pa Aruba, cu ta considera October, luna di flor, pa condicionnan cu tempo ta produci.
Riba continente Venezolano por a mira e actividad creciente di e Zona di Convergencia Intertropical, cu a cuminsa subi riba e parti Noord di Venezuela.
Na ciere di e edicion di awe, Tammy ayera tardi tabata sigui e direccion West Noord West, pues riba of den cercania di e islanan na entrada di region di Caribe, pa despues, bay direccion Noord Oost, pues bolbe Oceano Atlantico.
Aruba pues mester keda pendiente pa e sistema di aire friu den e nivelnan mas halto di atmosfera, cu ta wordo spera di produci yobidanan pa Aruba.
