AZV a firma acuerdo importante cu Fundacion Cardio Infantil

ORANJESTAD (AAN): Recientemente a cera un acuerdo cu clinica di Bogota Fundacion Cardio Infantil y

durante un conferencia di prensa director di AZV Edwin Jacobs a indica cu e momento aki ta uno historico, pa firma un acuerdo cu e di dos hospital cu AZV ta contrata, pa brinda aseguradonan cuido na Colombia.

Jacobs a splica cu for di 2019 tabata tin negociacionnan cu e hospital, pero debi na e pandemia esakinan a wordo posponi.

“Tabata un proceso di fuerte di negociacion, mirando e criterionan cu nos a pone den e licitacion pa e hospitalnan cumpli cune”.

Nos por anuncia cu un biaha mas nos ta yega na contrata hospitalnan Colombiano cu ta acredita internacionalmente y nacionalmente.

Hospitalnan di tremendo bon calidad, pa asina garantiza na nos aseguradonan cu na momento cu cuido na Aruba mes no por wordo duna y nan tin cu bay den exterior, nan ta ricibi e mihor trato posibel, segun Jacobs.

El a splica cu no tabata un proceso facil, pero na final tur cos a cana bon pa asina firma e contrato cu ta drenta na vigor for di prome di Januari di 2025.

Segun e director di AZV, e tipo di contratonan aki ta esencial, mirando e aumento den e demanda di cuido, principalmente pa motivo di envehecemento di nos poblacion.

Na Hulanda mes a corta gasto pa loke ta formacion di specialista, pues por tin mas limitacion den e posibilidadnan di ricibi trato medico specializa.

Pesey un acuerdo cu un hospital mas na Colombia ta importante pa nos isla.

Director di Fundacion Cardio Infantil Juan Gabriel Cendales Rey durante e conferencia di prensa a indica cu pa e hospital ta importante pa firma e acuerdo di colaboracion cu AZV.

“E colaboracion aki ta e comienzo di un colaboracion largo pa transforma salud di e poblacion di Aruba”.

Ambos institucion ta representa un bon oportunidad di expande e servicionan medico, pero tambe pa estrecha e lazonan den full e tema di colaboracion y formacion, segun Cendales.