Parlamentario Miguel Mansur a entrega concepto di ley pa legalisa ‘soft drugs’

Awor cu su termino ta casi caba

• Autoridad sinembargo sa con ‘soft-drugs’ ta hiba hende pa ‘hard-drugs’ 

ORANJESTAD (AAN): Mey-mey di siman, Parlamentario Miguel Mansur di Accion21 a bin cu e storia, cu “Legalisacion di ‘soft drugs’ ta ofrece un caminda pa miho salud publico, mas equidad social, reduci crimen y aumenta libertad individual.  Na opinion di Mansur, regulacion di substancianan actualmente prohibi ta provee sociedadnan e oportunidad pa miho regula standardnan di siguridad, reduci peso riba e sistema di husticia criminal y crea oportunidadnan economico. Mas cu tur cos legalisacion ta duna balor na e libertad di tur adulto pa tuma decisionnan informa tocante nan mesun curpa. Evidencia di paisnan cu ya caba a legalisa ta prometedor y no ta solamente representa un cambio di maneho pero tambe e oportunidad pa paisnan brinda un sociedad mas racional, cu mas compasion y mas husto.”

   El a bisa: ‘Soft drugs’ ta inclui substancianan manera cannabis, cierto psicodelico y otro substancianan cu no ta fisicamente adictivo y cu riesgonan abao. Un di e argumentonan mas na fabor di legalisacion ta pa mehora salud publico y siguridad. Un mercado regula lo brinda miho control riba e calidad y pureza di substancianan, reduciendo e riesgo. Criminalisacion di ‘soft drugs’ ta manda hopi consumido bao tera y menos probabel di busca asistencia medico. Legalisacion lo brinda comportamento mas informa y responsabel basa riba evidencia y habri caminda pa personanan busca ayudo medico sin miedo di repercusion legal.

   Legalisacion lo reduci presion riba sistema di husticia criminal. Hopi persona ta ser encarcela pa ofensanan no-violento relaciona cu ‘soft drugs’, nan legalisacion lo permiti mas recurso pa combati trafico di ‘hard drugs’, crimen organiza y ofensanan violento. Riesgo pa salud di ‘soft drugs’ incluyendo cannabis ta hopi menos cu alcohol y tabaco. Ta importante nota cu legalisa ‘soft drugs’ no ta nifica promove uso di droga pero si un manera pa reduci daño y permiti uso responsabel. Mescos cu alcohol y tabaco, legalisacion lo permiti individuonan tuma decision informa mientras ta salvaguardia salud publico y siguridad.

   Legalisacion ta provee oportunidadnan economico significativo. Mercadonan legal pa cannabis a proba di ta economicamente beneficioso na paisnan manera Canada y algun estado Americano. E industria legal di cannabis a crea hopi trabao den cultivacion, distribucion y investigacion ‘research’. Tambe legalisacion lo permiti miho control riba propaganda, benta y distribucion cu lo reduci e probabilidad cu menornan lo por yega na substancianan.

   Legalisacion lo promove libertad individual y responsabilidad. Den un sociedad democratico, adultonan mester tin e libertad di haci decision riba nan propio curpa tanten nan no ta haci daño na otro. Prohibi ‘soft drugs’ ta un violacion di libertad individual paso e ta restringi autonomia personal sin hustificacion basa riba evidencia. E argumento pa libertad ta specialmente valido ora nos considera cu alcohol y tabaco ta un peliger mas grandi pa salud y sociedad cu ‘soft drugs’ manera cannabis. Alcohol p.e. ta asocia cu un cantidad di resultado social negativo incluyendo violencia, accident, perhudica salud a largo plaso pero ta permiti. Consecuentemente tin poco hustificacion pa substancianan menos peligroso manera cannabis y ‘psilocybin mushrooms’.

   Evidencia di otro paisnan ta mustra cu na Hulanda cu a decriminalisa den añanan 1970, consumo di cannabis ta mas abao compara cu otro paisnan Europeo. Uruguay a legalisa mas recientemente cu consecuencianan positivo pa salud publico y economia. Tin mas y mas estudio cu ta mustra cu substancianan incluyendo psilocybin por tin beneficio pa terapia di depresion, PTSD y ansiedad.

   Awor cu Mansur ta riba su ‘last-lap’ di Parlamentario, el a bin cu un proyecto di ley.  Siendo cu hopi hende den mundo hudicial y di Polis sa cu uso di soft-drugs a lo largo pa gran parti ta pone e hendenan aki haya confiansa y ta bay purba hard-drugs, y eynan cos ta sali for di man.