AWSS a wordo introduci na un manera hopi rapido  

Directora di ATA, Ronella Croes:

• Mester a dune tempo pa comunica y set up e sistema debidamente 

ORANJESTAD (AAN) Directora di Aruba Tourism Authority, señora Ronella Croes, a elabora, den entrevista cu Matutino DIARIO, tocante ATA su preocupacion cu e rumbo y resultado cu Aruba Wastewater Sustainable Solutions NV (AWSS NV) ta bayendo, encuanto e renovacion y upgrade di RWZI, na Bubali Plas.

  CEO d ATA a splica cu ATA tabata tin varios reunion cu AWSS desde su inicio, y tambe a asisti gobierno prome cu e inicio y a duna diferente conseho y analisis tocante kico ta e miho manera pa introduci esaki.

   “El a wordo introduci na un manera hopi rapido. Den nos concepto, mester a dun’e tempo pa comunica y set up e sistema debidamente, y pa via di esey, incluso nos combersacion cu AWSS, tabata tambe e hecho cu nos ta wordo contacta door di localnan, cu nan ta wordo pidi pa paga e 20 dollar, cu nan ta keda pega, of turistanan cu ta ripiti nan bishita cu nan mester paga mas cu un biaha”, CEO di ATA Ronella Croes, a señala. El a subraya cu si e persona ta ripiti su bishita den un aña, e ta paga un biaha so, y asina Ley ta bisa. Pues, e sistema mester a “catch up” tur e cosnan cu a causa hopi destruccion den implementacion.

   Ronella Croes a expresa cu esaki ta un banda, pero e banda di e problema mes di e situacion di bo awa, y con e ta impacta nos lama, eynan el a bisa cu algun biaha caba ATA a conduci varios analisis riba e salud di nos awanan, principalmente den area di Palm Beach, Eagle Beach, y nan ta haciendo aworaki analisis na Bushiri, preparando pa posible ahustenan den e awa, pa hacie mas placentero pa usuarionan.

   “Pues, nos tipo di informacionnan asina ey, nos a hacie recientemente, pero kizas nos lo por ta haciendo pa aña entrante, ya cu ta sumamente importante pa soluciona esaki mas lihe posible. Nos sa cu tin esfuerzo cu ta bay pa remedia e situacion interino, mientras ta set up pa prepara pa e planta nobo, cu ta un proceso cu lo tuma hopi aña; y nos no tin e tempo ey pa warda asina largo”, CEO di ATA, Ronella Croes a remarca.