Rulienne Arends di FADA ta confirma:
*Mas o menos 2 mil hoben, entre 10 y 17 aña a ricibi e charla di ‘vaping’
*Problema di pulmon ta inminente na Aruba
ORANJESTAD (AAN): Parce cu un di e temanan riba cual e hobennan tin hopi interes ta riba uzo di ‘vaping’ ta prevalece. Esaki ta un dato cu a keda conforma door di Rulienne Arends, trahador preventivo di Fundacion Anti Droga Aruba (FADA).
El a indica cu tin dos aña escolar caba tras di otro caminda un di e topiconan mas pidi ta keda ‘vaping’. ‘Vaping’ ta keda den e top 3 bao di scolnan primario y secundario. E aña aki a duna mas o menos un total di 300 charla y den promedio 100 tabata riba e topico di ‘vaping’, Arends a confirma.
Mas o menos 2 mil hoben, entre 10 te cu 17 aña a ricibi e charla di ‘vaping’ y toch por wak cu e cantidad ta halto. Principalmente, ora cu ta duna e muchanan chikito informacion, mayoria di nan no sa mes e peliger y nan ta bisa cu un amigo ta uz’e y cu nan djis kier a test e pasobra e ta hole dushi.
Ora cu nan wak e consecuencianan por wak e cara di susto ta bin di biaha. Ora di yega na un edad un tiki mas halto ta bira mas dificil pasobra ta wak cu e hobennan no ta worry hopi mas, el a señala.
Tin hopi aña ta keda cu FADA ta keda pone hopi enfasis riba e parti di control. Supermercadonan unda e hobennan ta haya e productonan aki na prijsnan relativamente abao. Pa cumpr’e, e muchanan ta sabi y ta pone placa hunto. Nan ta haya esaki sin ningun control.
Mester corda cu ley a cambia. Mester tin 21 aña, e bendedo mester pidi ID na esnan cu kier cumpra cualkier producto cu ta contene tabaco, incluyendo ‘vape’. Esaki ta keda un di e problemanan mas grandi, cu no tin control.
Por manda un mucha di 12 aña drenta supermercado y nan ta bend’e e ‘vape’ sin pidi ID. Ta haya algun hoben cu a indica cu nan ta haya ‘vape’ na cas. Tin mayor of rumannan mas grandi cu ta duna e hoben e ‘vape’. Tin casonan caminda e mayornan ta bende ‘vape’ y nan ta coy scondi di e mayor, por ehempel.
Arends a remarca cu lo ta na su luga, pa esnan cu mira algo cu no ta bon denuncia esaki pa esnan cu no ta cumpli cu ley haya un boet pisa y si ta un caso cu ta ripiti pa kita e vergunning. Mester ta un tiki mas estricto cu esaki y sigur ta algo cu lo bay yuda.
KPA hunto cu DVG y FADA ta haciendo nan ‘best’. Tabatin un accion un luna pasa unda cu a bolbe bay algun supermercado duna nan ‘warning’ un biaha mas pa recorda nan di esaki pasobra e ta algo cu tin cu keda pasa, pero tanten cu no tin un boet nan no ta bay wak esaki como un peliger. Nan djis ta wak e placa cu nan ta gana.
Specialistanan di pulmon ta tene cu den mas o menos 5 aña e casonan ta bay cuminsa subi of bin dilanti pa loke ta problema di pulmon mirando con hopi hende ta haci uzo di ‘vaping’, Rulienne Arends a remarca.
