President Hose Figaroa di FTA:
ORANJESTAD (AAN) Hose Figaroa, Presidente di FTA, a compronde for di algun combersacion cu e tabata tin, cu Gobierno dentro di poco lo anuncia un legalizacion pa personanan indocumenta, cu ta na Aruba caba.
FTA tin entendi cu algun instancia, entre otro Sociaal Economische Raad (SER), a duna un conseho riba esaki, tocante con ta e miho manera di pak aan e situacion aki.
“Sinembargo, nos ta kere cu legalizacion di e trahadornan cu na e momentonan aki ta indocumenta, no ta bay tin un efecto hopi grandi riba scarcedad di trahado, como cu mayoria di esnan cu ta na Aruba cu no tin documento, si tin un trabao caba. Nan ta trahando di forma ilegal. Bo ta ripara esey tambe. Bo no ta mira e hendenan biba riba caya, bo no ta mira nan pidi placa, nan ta sostene nan mes financieramente, pues nan mester tin un trabao”, mr. Hose Figaroa a menciona.
Pues, gran parti di e trahadornan indocumenta, na momento cu haya un status legal, esey no ta bay cambia mucho pasobra nan tin un trabao caba, probablemente mayoria di nan lo sigui eherce e trabao ey.
“Tin algun di nan cu lo move si, kizas bay empresanan unda nan por haya mas stabilidad laboral, pero na mesun momento door di move di un caminda pa otro, bo ta crea un gap cu no tabata tey anteriormente”, segun presidente di FTA” Figaroa a relata y a reitera cu lo bay tin un efecto, pero esaki lo no ta dje grandi ey, pa cu e necesidad cu tin aworaki.
E lider sindical a señala cu e doño di trabao mester inventariza cuanto trahado e tin aworaki, y tur trahado indocumenta mester duna nan contribucion direct tambe, pa loke ta trata entre otro, pago di AZV, AOV, etc. Pa loke ta indirectamente, nan ta contribuyendo caba na momento cu nan cumpra cualkier cos den tienda e ta paga BAVP riba dje.
