Aworaki SVT ya ta registra mucha homber pa haci test y pasa den e seleccion

Coordinador di SVT Jessy Ras:

ORANJESTAD (AAN) Jessy Ras, coordinador di Trayecto di Formacion Social (SVT), a informa DIARIO, cu nan ta bezig ta registra aspirantenan masculino.

   Jessy Ras a bisa cu edad ta keda ainda entre 17 pa 24 aña. E ta haci un yamada na mayornan cu tin den e edadnan aki, cu na e momentonan aki ta na cas y no ta haciendo nada, of cu ta dificil pa nan haya trabao, pa stimula nan yiu pa tuma contacto cu SVT, pa nan yega eynan pa haya informacion. Y esnan cu tin duda pa bin haci e testnan necesario. El a comenta cu tin ora nan ta switch nan mentalidad y nan ta gusta, por ehemplo, ora cu nan ta bin test pa deporte. Y nan ta cuminza cu e trayecto ora nan ta keda cla cu e seleccion.

Tin hobennan cu a yega forza pa nan mayornan pero asina mes nan a caba cu e trayecto y awo ta den fase 2 di e trayecto. “Mi ta haya cu mayornan y famia tambe tin cu stimula nan yiunan y trece e hobennan cerca nos, y hobennan cu tey eyfo, bin acerca nos”, Jessy Ras a reitera.

El a agrega cu SVT hunto cu Arumil cu ta e parti cu ta traha hunto cu nan den e prome fase, tey pa yuda e hobennan pero nan mester kier wordo yuda tambe.

Ras a indica cu STV ta bay tuma contacto cu tur e instancianan gubernamental, bisa nan ora tin inscripcion, y wak si tin interes, por ehemplo hobennan cu tabata na KIA, pero e proceso ta dura y STV su tempo ta cortico. Ta bay averigua ki posibilidad tin. Tambe e hobennan cu aworaki ta cay bao di reclassering wak si tin di nan tin un tiki interes. Esaki ta un opcion pa mehora nan bida. “Ora bo cay cera bo ta haya mal nomber, trabao ta bira dificil pa bo haya, y haciendo SVT ta yuda bo pa cambia bo bida”, el a subraya.