ORANJESTAD (AAN): E studiante J.A. Garcia Valdez a haye obliga na bandona su pais natal Venezuela, y a bin biba na Aruba.
El a keda eternamente agradeci cu e isla a dune bon bini y a yude cu diferente oportunidad.
El a yega asina na Abraham de Veerschool na San Nicolas, como entrada den avo-onderwijs. El a logra traha duro pa compronde Hulandes, y asina a cuminsa bay dilanti den su lesnan na e MAVO school aki. El a logra su diploma, y asina a dicidi na bay Hulanda pa sigui expande su conocemento.
E bon noticia a caba di drenta, cu el a logra awor su HBO-diploma na tera frieu. El a logra su Bachelor of Science (Bsc) den Software Engineering, cu distincion cum-laude.
Ademas di Aruba, e ta hopi agradecido na esnan na Hulanda cu a sigui yud’e den su desaroyo profesional. Un pais cu a dune bon bini, y suministra hopi mas oportunidad.
Mientras tanto e team di docente di Abraham de Veerschool a indica cu esaki ta algo cu e scol a bin ta logra ultimo tempo, como cu nan ta un team cu ta traha hunto y duro pa e alumnonan.
