ORANJESTAD (AAN): Ta cu masha orguyo Aeropuerto di Aruba ta felicita WINAIR pa e lansamento exitoso di nan vuelo inaugural pa Corsou y Aruba haciendo uzo di nan avion nobo cu ta un ATR-500.
Desde 14 di juli di e aña aki, WINAIR lo opera e servicio entre Corsou-Aruba, Corsou-Bonaire y vice versa marcando un milestone significativo pa e aerolinea.
Pa sostene e expansion di ruta WINAIR a anuncia e incorporacion di un di dos avion ATR na su flota den e siguiente lunanan. E desaroyo emocionante aki ta demostra WINAIR su compromiso cu crecemento y e conectividad den region Caribe. E ATR-500 nobo di e aerolinea ta e prime como propiedad di e aerolinea mirando cu anteriormente nan tabata lease e DHC-6 Twin Otter for di Air Antilles pa un periodo di seis aña pa sirbi e islanan ABC y Republica Dominicana.
E introduccion di e ATR nobo, awo e avion mas grandi di e flota, no solamente ta amplia e WINAIR su capacidadnan operacional sino e ta pone un standard nobo pa biaha den e region Caribe. Cu su interior nobo y 48 asiento e avion ta ofrece un miho nivel di comodidad y luho na su pasaheronan. Lo opera e servicio di Sint-Maarten pa Aruba cu un escala na Corsou cu e avion ATR tres biaha pa siman riba diaranson y diabierna.
Aeropuerto di Aruba ta reconoce WINAIR como un socio valioso y ta pa e motibo ey nan ta felicita e aerolinea pa e milestone aki. “E incorporacion di e avion nobo na e flota di WINAIR ta refleha e compromiso comparti pa mehora e conectividad entre e islanan di Caribe Hulandes. Nos ta felicita WINAIR pa e echo importante aki y nos ta orgulloso di por traha conhuntamente cu e team di WINAIR pa asina avansa e conectividad y fortalece e relacionnan den region. Nos ta spera di por sigui traha hunto pa brinda experiencia excepcional di biahe pa e pasaheronan di Caribe”, asina Aruba Airport Aviation Business Development Executive Jo-Anne Meaux-Arends a duna di conoce.
