Awo tur cu ta contribui cu Centro di Bario y Deporte Dakota por wak unda cada dies placa ta bay

Carmichel Bikker, Presidente CBD:

ORANJESTAD (AAN) -- Presidente di Centro di Bario y Deporte Dakota, Carmichel Bikker, den conferencia di prensa a hiba palabra, den nomber di e Bestuur di Centro di Bario Dakota (CBD).

            El a cuminza bisando cu prome cu el a bira Presidente di Centro di Bario y Deporte Dakota, un di su peticionnan na SV Dakota, tabata pa Gimar Croes y henter su comision bay forma y keda cla cu su relatonan financiero. Den contacto telefonico cu Edsel Lopez di PKF, el a bise pa bin cerca dje wak kico e por haci. Y asina tur hunto a bira y keda partner.

            Esaki kiermen cu asina lihe nan por pone e seyo di oficina accountancy di señor Lopez pa PKF tambe ta riba nan relatonan pa futuro y pesey nan ta consolida un solo organizacion bao un solo oficina cu guia y cu consehonan.

            “Ora cu mi wak e relatonan financiero aki, mi ta bisa algo cu semper un persona a bisa ami: ‘bo por traha hopi duro pa un organizacion, pero si nunca bo por mustra con bon bo a maneha cu bo cifranan, nan no ta wak e balor di bo trabao’. Awe e balor di e trabao ta hancra, nos a entrega e prome fase, awe te cu 2023 SV Dakota ta na ordo”, Carmichel Bikker a expresa.

            El a menciona cu aworaki tur cu pasa rond di Centro di Bario Dakota ta mira con hopi trabao di construccion ta tumando lugar, y esakinan ta esfuerzonan haci te ainda, riba forza di algun comerciante cu ta yuda nan, pero tambe nan ta bay anuncia ora cu e bario tambe ta aporta pa reconstrui e Centro di Bario y Deporte Dakota, manera mester ta.

            El a comenta cu hopi hende di e bario cu el a acerca a pidie cu nan kier wak e structura financiero na ordo, y awo e prome fase a cuminza y ta ora pa tur hunto bay bek reorganiza y reconstrui nan Club.            “Ban bek drenta den nos Centro di Bario y Deporte Dakota pa boso por mira e cambionan tumando lugar, cu nos ta trahando riba dje, y cu e relato financiero, oficialmente mi por bisa awe, den nomber di henter bestuur di Centro di Bario Dakota, hopi danki Edsel, hopi danki Herbert y henter staf di PKF. Nos ta orguyoso di bisa oficialmente, ki emocion pa mi sinta akinan, di wak e bukinan aki”, Carmichel Bikker a expresa.

            El a subraya cu cada instancia cu ta yuda nan por wak unda cada dies placa di nan inversion ta bay, y cu nan por compronde cu no ta facil. Ta mas di 200 mucha, practicamente tur dia, ta haci uso di e facilidadnan y tanto e Comision SV Dakota como Centro di Bario y Deporte Dakota, ta responsable pa e seguridad tur dia, y tambe pa e uniform y tur loke ta rekeri inversion ta wordo haci.