Hobennan di Aruba ta cordialmente invita pa participa den 'Ricardo Cooper Basketball Clinic'

Parlamentario Alvin Molina (MEP):

E clinica lo ta completamente gratis

ORANJESTAD (AAN):  Diabierna mainta, a tuma luga e apertura di Ricardo (Tico) Cooper Basketball Clinic. Sr. Cooper a hunga basketball professional na Merca, Hulanda y Belgica.

            E ex basketbolista internacional Arubano ta organisando un clinica di basketball di seis dia pa e mucha- y hobennan di Aruba. E clinica a inicia dia 26, 27 y 28 di juli y ta continua dia 2, 3 y 4 di augustus na Basketball Court di Village na San Nicolas. E meta di e clinica ta pa siña e hobennan hunga e disciplina di basketball y/of duna nan e tips y herment pa nan por mehora den e deporte.

            "Mi ta kere den e teoria di “Broken Windows”, esaki ta nifica cu si algo kibra of deteriora den bario y si tarda hopi pa drech’e e otro cosnan rond di dje tambe ta bay atras. Si drech’e y mantene e tin un “spin off effect” positivo riba e bario, emocion y comportacion di e habitantenan. Mi ta contento cu Minister di Deporte a scucha mi peticion y apesar di e situacion financiero precario cu Aruba tabata aden saliendo di e pandemia a colabora y aloca fondo pa drecha e cancha di basketball. Ta bunita pa mira cu e hobennan di e bario, IBiSA y organisacion ta haciendo bon uzo di e cancha renoba.

            E Basketball Court ta carga nomber di Ricardo Cooper como un ehempel di tur loke bo por logra ora cu bo dedica bo mes na algo positivo. Sr. Cooper, cu a nace y crece den Village San Nicolas, ta asina honra cu e cancha ta carga su nomber y como muestra di aprecio y riba su propio gasto a bin di Belgica y organisa un clinica di basketball pa e hobennan di Aruba.

            Mi ta gradici Sr. Cooper pa e bunita gesto y proyecto aki. Alabes mi ta invita tur mucha y hoben di Aruba pa participa na e clinica di basketball cu ta completamente gratis.

            Por ultimo, mi ta encurasha tur hende pa hunto nos cuida y mantene e cancha di baskball. E ta tarea di Gobierno di Aruba, habitante y di tur esnan cu ta haci uzo di dje pa cuid’e pa nos por gosa di e cancha pa hopi aña mas", Parlamentario Molina a expresa.