Aerolinea Z Air a manda busca dos regional jet Embraer

ORANJESTAD (AAN): Manera ta conoci, e aerolinea cu sede na Bonaire, esta EZ Air ya algun tempo pasa a cambia nan nomber y a bira ‘Z Air’.

   Awor tin desaroyo nobo, esta cu nan a caba di firma pa busca dos avion mas pa reforza nan fleta.  Nan a haci esaki despues di un periodo di estudio y negociacion.  Nan ta buscando dos jet regional, cu ta un avion tipo Embraer 140 fabrica na Brasil.

   Despues di a firma e contract, awor ta bay traha riba preparacion di e dos avionnan pa nan yega Curaçao pa wordo tuma den servicio.  Director di Z Air, esta René Winkel a indica cu esaki tin un proceso largo su tras.  Nan calculo ta cu e prome Embraer 140 lo yega Curaçao den ultimo cuartal di 2024, y por wordo tuma den servicio relativamente rapido.

   E dos avion Embraer 140 lo wordo usa pa Z Air principalmente pa e vuelonan pa Medellin, pero lo tin otro destinacion cu lo bin acerca.  Unabez cu e dos avionnan wordo agrega na e fleta.

   E tres avionnan mas chikito modelo Saab 340B, lo sigui forma parti di e fleta y lo ta principalmente pa vuelonan entre islanan ABC.

   Segun Winkel, nan ta contento cu e logro.  El a confirma cu di basta tempo nan tin wowo riba e avionnan jet regional aki, y nan ta convenci cu e ta net loke nan mester pa por sigui crece, expane ruta, y sigura un servicio na nivel.

   Riba e potret por mira d.r.p.d. Stephen Linebaugh (Regional One), Sueyenne Dammerman (Director Comercial y Financiero Z Air), y Ivo Oduber (Quality Manager Z Air).

   Sueyenne Dammerman a indica cu e ta orguyoso, pasobra semper nan a demostra di ta un compania responsabel, y cu e adkisicion aki nan a mustra tambe cu compania 100% local, nan por haci’e, tanten cu nan traha di un forma responsabel y dirigi.