Awenochi ta inicia e serie di podcast nobo di DNM “Cadushi ta Zona cu Dyrick”

ORANJESTAD (AAN):  Manera ta conoci Directie Natuur & Milieu (DNM) a anuncia e lansamento di e serie di podcast “Cadushi ta Zona cu Dyrick” siman pasa. 

Un podcast nobo dedica na entre otro educa y envolv’e comunidad local tocante Aruba su medio ambiente, naturalesa, conservacion, herencia cultural, desaroyo sostenibel, salubridad y nan conexion vital y mucho mas.

            Awe, diahuebs 27 di maart 2025 pa 7:00pm e prome episodio “Naturalesa y su importancia” lo ta obtenibel riba rednan social di DNM como tambe riba plataformanan di Youtube y Podcast. E serie, “Cadushi ta zona cu Dyrick”, ta presenta door di Dyrick Wouters,  un hoben curioso y pasiona cu Aruba su naturalesa y herencia cultural. Ta invita grandi y chiquito pa sintonisa e serienan aki y asina bay riba un biahe hunto cu Dyrick, cu ta explora Aruba su biodiversidad, tradicion, esfuerso pa conservacion y retonan ambiental.

            Den e prome episodio Dyrick ta combersa cu sr. Gisbert Boekhoudt- Director, Yahaira Jansen -Onderzoeker y Nadine Da Silva- Beleidsmedewerker na DNM. E combersacion ta bay over Aruba su Naturalesa y su importancia. Sigur un episodio hopi interesante cu ta captura atencion.

            E podcast ta disponibel entrante awe 7:00pm riba plataformanan manera Spotify, Apple Podcast, tambe riba e rednan social manera Facebook, Instagram y YouTube channel di DNM. E fantastico di e podcast ta cu por bay scucha of wak e episodio aki ora ta conveni bo. 

            Ta encurasha un y tur pa bay ‘subscribe’ na e canalnan di DNM riba e diferente plataforma nan menciona pa asina no perde niun episodio di “Cadushi ta zona cu Dyrick”.

            Lo tin un episodio nobo cada dos siman riba diahuebs pa por scucha of wak, Asina bo tambe por haya sa mas di Aruba su ecosistema unico, con pa conserva nos fauna, efecto di cambio di clima pa Aruba y con turismo sostenibel ta beneficioso Aruba y con esakinan ta aporta na mantencion di nos identidad cultural, y hopi mas.