ORANJESTAD (AAN)—Wendrick Cecilia, futuro minister cu lo forma parti di e Constelacion AVP-Futuro, a duna su declaracion na miembronan di prensa,
Diamars despues cu e dos formador-informador a reuni cu Gobernador Boekhoudt, y cu a keda confirma cu Diabierna e Gabinete nobo aki, lo huramenta.
Wendrick Cecilia a declara cu esaki tabata un dia historico pa e miembronan di e gobierno nobo, y sigur pa su persona tabata hopi special e momento cu el a huramenta como Parlamentario di Pais Aruba.
E tabata e honor y privilegio di mas grandi cu e por a ricibi, pero pa a wordo categorisa y scogi como un di e candidatonan pa minister, e ta un privilegio grandi.
“Mi ta kere cu e sentido aki di privilegio ta hiba ami na humildad, gratitud, pero e sentido cu mi tin cu bay expresa mi mes, ofrece mi talento, mi tempo, mi curazon y tur locual mi tin na ofrece pa Pais Aruba, p’asina mi por ehecuta un trabao, un maneho, cu lo ta di bendicion pa Pais Aruba. Mi ta kere cu Aruba merece hopi mas miho di locual el a ricibi e ultimo siete añanan aki”, Wendrick Cecilia a expresa.
El a sigui bisa cu 6 di December tabata un momento clave unda e por a mira cu su comunidad, nos comunidad, a dicidi cu nan ta transiciona for di gobierno, pa simplemente nan enfoca riba reduci medidanan fiscal, pero pa un gobierno cu ta bay ehecuta inversion den hende, den nos producto, den nos pais pa garantiza cu experiencia di bida, experiencia comercial na Aruba, ta wordo eleva, unda cu un y tur por tin oportunidad pa avanza den bida.
“Pa mi esaki ta e privilegio y e honor, y mi ta keda ripiti esaki, di mas grandi cu mi por ricibi”, Wendrick Cecilia a reitera.
El a agrega cu tur bon conseho semper ta importante pa cualkier funcionario publico. “Mi ta kere cu nos tur tin cu realiza cu humildad ta reconoce cu bo no tin tur e conocemento y bo tin cu suplementa esaki cu personanan cu tin experiencia y e conocemento, y bay den dialogo cu e personanan aki. Y pa mi, sigur, rondona mi mes di bon conseho ta bay ta clave pa cualkier ministerio cu mi lo kier responsabiliza di dje”, Cecilia a señala.
