Awe tin debate den parlamento entre Evelyn y Mike

Topico lo ta costo di bida

• Aki ta referi na inflacion importa 

ORANJESTAD (AAN):  Riba peticion di Mike Eman, lider di partido AVP, awe Dialuna ta tuma luga un debate den Parlamento riba e topico costo di bida.

   Pa e reunion aki Minister Presidente Evelyn Wever-Croes lo ta presente pa informa Parlamento kico tur ta wordo haci pa baha e costo di bida.

   Durante reunion tambe lo presenta e origen di e aumento di costo di bida, mirando cu Aruba ta importa practicamente tur cos, y momento cu mundo henter a haya su mes den un crisis di inflacion, Aruba a importa e inflacion aki tambe.

   Ora ta trata di inflacion importa, un gobierno di e pais mes no por haci mucho. Pero asina mes Gobierno lo mustra kico si a wordo haci, apesar di tur cos.

   Ta di spera cu e parlamentario cu a pidi e reunion, esta Mike Eman di AVP presenta den Parlamento y keda durante henter e reunion. Ta conoci cu Mike Eman no ta asisti na reunion, of si e asisti mes, ta den e sala di reunion solamente ora e ta hiba palabra y despues ta core bandona e reunion.

   Un topico global: E asunto di costo di bida no ta djis algo exclusivo pa Aruba!  Hopi Arubiano cu ta bibando na Hulanda tambe ta kehando con cierto producto ta subiendo drastico di prijs.  Sin papia mes di prijs cu a subi tur caminda di webo, lechuga, carni, y mas.

   Hecho ta cu prijsnan di cuminda rond mundo aworaki ta 27% mas caro compara cu 2014 y 2016.  Y desde cu Rusia a invadi Ucrania, prijs di grano a conoce un subida exponencialmente tambe.

   Corda con na comienzo di e Pandemia di Covid-19, con prijs wholesale di cuminda a cay.  Pero despues di esey, y te cu awor, e prijs a subi masha fuerte mes.  Sin lubida cu e prijs mundial di transporte via barco a subi na teritorionan hamas bisto.

   Pesey mes keto bay e FAO Food Price Index ta keda mustra con prijsnan ta sigui subi rond di e planeta aki.  E prijsnan halto di cuminda ta afecta tanto e productornan y consumidornan di cuminda.

   Horario di reunion: Riba e Agenda di Parlamento, e reunion di awe Dialuna 24 di April 2023 ta stipula pa cuminza 10:00 am.   E por wordo mira na ParlamentoTV na canal 46, of na parlamento.aw 

---