Den e IMF Spring Meeting Aruba a sinta cu seis banco grandi di Merca:
ORANJESTAD (AAN) – Minister Xiomara Maduro, titular di Finanzas y Cultura, den conferencia di prensa Diahuebs a indica cu ora hunto cu Minister Presidente a keda cla na Hulanda, cu e asunto di refinanciamento di e debe (Covid-19), di cual ainda falta algun detaye manera si lo bay tin un periodo di gracia, forma di pago, etc., nan a sigui nan biahe pa Washington DC, unda nan a atende e IMF Spring Meeting 2023, unda nan a sinta cu seis banco internacional.
E dignatario a señala cu ta seis banco grandi di cual tres ta esnan di mas grandi di Merca, cu tabata tin portanan habri pa Aruba por a bin sinta cu nan y mira kico ta e opcionnan, pasobra nos gobierno kier brinda Parlamento di Aruba tur opcion cu tin; e opcion di Hulanda pero tambe esun cu tin aworaki pa Aruba subi mercado internacional, manera e tabata haci’e pa e ora ey wak kico tur ta e opcionnan cu por presenta na Parlamento, pa nan ta bon informa riba esaki. Asina e mandatario a relata.
“Mester bisa cu e reunion cu e seis banconan aki a bay bon. Aruba tin entrada riba mercado internacional. E entrada aki nos tabata tine caba prome cu e pandemia y mester bisa cu e banconan tur, ta dispuesto pa refinancia Aruba su debe”, e mandatario a expresa.
El a splica cu nan por refinancia e debe completo cu ta algo cu no ta straño, pues despues di e pandemia hopi ta e paisnan cu ta busca un modo di trece un otro structura den nan portfolio di debe, pasobra tur a acumula un debe di un of otro manera pa por a surpasa e pandemia, y nan ta haci esaki pa tene cuenta cu nan capacidad di pago bek, nan ta busca manera pa refinancia y Aruba den esey, tambe ta locual e ta busca no solamente pa refinancia e debe completo, pero tambe pa wak cual ta e posibilidadnan cu e debe cu Aruba tin cu Hulanda, lo por wordo refinancia apart.
Minister di Finanzas a mira cu e recuperacion di Aruba a hala atencion di e banconan. Nan a wak cu, den Caribe, Aruba ta un di e paisnan cu a recupera bek y hasta a bay dilanti. “Ya caba nos cifranan ta surpasa e cifranan di turismo di 2019. Turismo ta e motor di Aruba su economia, y esaki ta bayendo hopi bon; e resultadonan ta hopi bon, y e parti unda a brinda e vacuna a bay hopi lihe y Aruba a habri hopi lihe pa mundo, y economia a keda stabil den e sentido cu por a start up di biaha, y esaki ta debi na tur e sosten financiero cu a wordo brinda den e periodo di pandemia pa por a sostene e economia di Aruba”, Minister di Finanzas a subraya.
