Mayoria den Parlamento ta sostene presencia di Benny???
- Mike cu a faya di controla Benny awor por dicidi pa Pueblo?
- Pueblo ta paga Benny pa privilegio cu otro trahador no tin
ORANJESTAD (AAN)- Aparentemente mundo politico di Aruba por bolbe na normalidad despues cu algo sumamente grave a pasa den seno di Parlamento di Aruba. Un suceso cu mester wordo discuti den luz di e impacto cu e tin riba reglanan cu ta wordo mantene pa trahahadornan di Aruba.
Un compania por retira un trahador pasobra el a wordo condena dor di Huez? Esaki ta un pregunta importante cu mester ta discusion na un pais, cu ta basa riba e hecho cu ley pa uno ta ley pa tur.
DIARIO ta insisti cu e presencia di Benny Sevinger den Parlamento ta trapa riba democracia na un forma mucho mas severo cu solamente e posicion moral di un partido, cu ta nenga di acepta sentencia di Huez.
AVP na e momentonan aki no solamente ta demostra cu e no tin ningun respet pa e sistema cu Husticia na Aruba ta haci husticia.
AVP na e momentonan aki ta exigi, pa trapa riba un sentencia di Huez cu ta mishi directamente cu e pregunta si Benny Sevinger por gosa di confiansa di Pueblo pa e sirbi Pueblo den un funcion publico.
Pa Benny Sevinger esaki ta nifica, Huez a dicta un sentencia den cual e ta bisa cu Benny Sevinger no por ehecuta su trabou como representante di Pueblo den un funcion publico, loke ta mucho mas cu un sentencia cualkier cu por pone fin na empleo di un persona.
Pa comprende e peso di privilegio politico cu AVP ta duna Benny Sevinger enfrente e reglanan cu ta conta pa e trahador comun y coriente, mester comprende con personanan cu comete actonan contra ley, den mayoria di caso ta perde confiansa di nan dunador di trabou y ta perde nan trabou.
Cuanto trabou cu no ta empleo den Parlamento, ta exigi pa un trahador tin un strafblad limpi, loke ta nifica cu nan no tin problema cu husticia?
Cuanto trahador tin e privilegio cu un condena di Huez no ta haci cu imediatamente nan ta perde nan trabou y solamente ora nan gana e caso den apelacion nan por reclama regreso na nan trabou, si esaki ta wordo acepta?
Kico lo a pasa den caso di Benny si e no tabata un politico y no tabata tin e lider di e partido como su socio?
Algo sumamente serio ta pasa pasobra ta Pueblo di Aruba ta paga Benny Sevinger salario pa representa Pueblo, cu segun Ley cu ta papia di mayoria den Parlamento pa por tuma decision na nomber di Pueblo.
Den e caso aki pues importante ta bira kico no Mike Eman, amigo intimo di Benny Sevinger y cu a faya den su control di loke segun Huez, Benny Sevinger lo a haci, pero mayoria den Parlamento ta dicidi pasobra ta e mayoria den Parlamento mester dicidi pa Pueblo y no Mike so.
Tin puntonan hopi serio cu ta atende cu e hecho cu atrobe Mike Eman ta exigi pa boluntad di su persona y su partido wordo acepta den Parlamento, cu no solamente ta e institucion sagrado di democracia, pero tambe e institucion cu ta wordo paga cu placa di Pueblo y no por ta gosa di privilegionan riba tereno criminal cu no ta alcansabel pa e Pueblo cu ta paga su politiconan pa goberna su pais.
Mike Eman no tin ningun motibo pa kere cu e tin derechonan exclusivo na Aruba, cu el a perhudica riba tur tereno.
Mike Eman a ricibi salario di Pueblo pa e traha pa e Pueblo, cu el a hiba na destruccion financiero, social y hasta riba tereno di autonomia pasobra si awe tin supervision financiero ta pa motibo di fayo di Mike Eman cu a percura pa e peso actual di belasting.
Awe Mike Eman ta faya cu democracia y ta entrega na Benny Sevinger, cu a faya siendo Ministro den Gabinete di Mike Eman, derechonan cu e humilde trahador di Aruba no tin.
Pero ta e humilde trahador di Aruba mester paga e salario cu Benny Sevinger ta ricibi.
Algo sumamente serio ta pasa na Aruba, caminda atrobe un scandal di AVP ta destrui e base democratico di e pais y ta exigi pa Pueblo paga salario di Benny Sevinger den Parlamento, contra boluntad di mayoria di representante den Parlamento.
Resumen di e analisis aki ta cu Mike por loke ningun otro politico por, cu ta destrui e base democratico di Aruba y comberti Aruba den un pais caminda loke Mike ta pensa y Mike ta dicidi, ta loke ta pasa cu Pueblo.
