Sindicato ABV y Hospital a firma CAO nobo

Un logro grandi pa empleadonan di Hospital

• Pa prome biaha desde 2018 a yega acuerdo riba un CAO
• Ta bay otorga un signing bonus pa tur empleado di Hospital 

ORANJESTAD (AAN): Riba Diabierna, Hunta di Directiva hunto cu e team di negociacion di Hosptal y ABV ta hopi orguyoso di por anuncia cu pa prome biaha desde 2018 e partidonan a yega na un acuerdo riba un CAO.  E CAO aki tin un duracion di 3 aña y ta di 1 di januari 2023 te cu 31 di december 2025.

   Riba 2 di november 2022 team di negociacion di CAO di HOH hunto cu ABV a start cu e negociacionnan di CAO. Na momento cu a start cu e negociacionnan ainda e reduccion den cuido tabata na vigor cual tabatin influencia riba e negociacionnan.

   Team di negociacion, cu ta consisti di representanten di ABV y tambe di HOH a firma riba 19 di april 2023 un acuerdo di negociacion unda a establece un acuerdo provisional riba e condicionnan di trabao financiero. Esaki den espera di e acuerdo entre e partidonan riba e revision y actualisacion di e texto di CAO pa cu e cambionan den e codigo civil y tambe un posibel uniformidad den e condicionnan di trabao despues di e fusion entre Stichting Ziekenverpleging Aruba (SZA), Fundacion Servicio Laboratorio Medico Aruba (FSLMA) y Stichting Bloedbank Aruba (SBA). Na mei 2023 a stop cu e reduccion den cuido cual a duna oportunidad pa asina termina cu e negociacionnan. 

   Hunta di Directiva hunto cu e team di negociacion di CAO di HOH y ABV a dicidi di otorga un signing bonus pa tur empleado di HOH. E motibo tras di signing bonus aki ta cu despues di 5 aña a logra sera un CAO cu tin un duracion di 3 aña cu ta un logro grandi desde 2018.

   E puntonan di mas importante cu a negocia ta ahustacion di inflacion riba e salarionan cual lo subi cada aña calendario durante e duracion di e CAO aki. Tambe e pago di e periodiek anual y loyaliteitsbonus a ser reanuda na aña 2023 bou di e condicion cu desde 2023 e pago aki lo sosode un biaha pa aña na luna di juli. Tambe e pago di e gratificacion di fin di aña ta worde reanuda na 2023.

   Pa por rebaha/ pone un fin na loke ta ausencia door di enfermedad (AO) ta introduci na aña 2023 un recompensa den forma monetario cada kwartaal desde 1 di januari 2023.

  Tambe e partidonan a traha riba ahustacionnan den e texto di CAO y e actualisacion di e texto pa cu cambio den e codigo civil. Pa splica mas tocante e cambionan aki lo bay tin sesionnan di informacion pa asina tur empleado cera conoci cu contenido di e CAO nobo aki.

   Un bes mas di parti di Hunta di Directiva danki na e team di negociacion di HOH y ABV pa tur nan esfuerso y HOH completo pabien cu e logro grandi aki.