ORANJESTAD (AAN) -- Minister di Enseñanza y Deporte, Endy Croes, den entrevista cu DIARIO a señala cu DPS, cu ta e Departamento di Scolnan Publico, na unda gobierno por tuma decision.
E mandatario a subraya cu eyden gobierno a pidi for di trempan pa no mishi cu scol geld y pa esey keda igual. El a bisa tambe cu tin nuebe stichting di scol, di cual un di nan ta SKOA, cu ta un di esnan mas grandi cu 46 scol bao di dje, mientras cu gobierno mes tin 20. El a splica cu den un stichting ningun gobierno, ningun minister por mete of tuma decision.
Ki ora cu tin un problema minister ta yama nan na mesa, pa vocifera su deseo y bisa con gobierno por contribui pa por resolve problema. E ta corda aña pasa na Januari, cu tabata tin problema na Colegio Arubano cu hasta tabata tin welga y e bestuur, y obispado a cay aden y a sinta cu tur partido, pero solamente so por a tuma decision.
Y biniendo bek tocante e tema di SKOA, e minister a bisa cu berdaderamente tur stichting ta haya ayudo di gobierno, atravez di subsidio y tambe via 'normbedrag'.
Esaki ta pa ley cu scol ta haya un suma extra, depende cuanto local tin, ki cantidad di alumno, etc. E dignatario a agrega cu si banda di esey nan tin otro gastonan y decision di SKOA ta na final cu nan ta aumenta e schoolgeld, gobierno no por bisa cu no, cu nan tin stop y draai bek.
Unico cos cu gobierno por haci ta purba di duna un poco extra placa, y pesey el a splica den detaye e caso di SEPB, pa splica e proceso, y a reitera cu tur stichting ta bay haya placa extra, depende su grandura, cantidad di alumnonan, etc., den e proceso di trek recht e 'normbedrag' cu keda hopi aña deteni.
