Awe Diahuebs tin un interesante Open House na Universidad di Aruba

Charise Hoen-Daly cu informacion:

 *Invitacion ta pa studiante, profesional y trahadornan 

ORANJESTAD (AAN) – Charisse Hoen-Daly, Coordinador di Asuntonan di Studiante, Marketing, Comunicacion y Relacionista Publico di Universidad di Aruba, a expresa na DIARIO, cu e ta hopi contento di wak e cambionan den e comunidad, y e cambionan cu tambe tin na Universidad di Aruba, y esakinan lo wordo presenta na comunidad, durante un “open house” mañan dia 2 di November.

Un di e cambionan grandi ta cu e renovacion di e edificio, cu ta kedando cla cu financiamento di UNDP (Programa pa desaroyo di Nacionnan Uni).  “Kiermen cu nos ta bay habri un aña academico nobo, unda Universidad ta bay tin su laboratorio, Biblioteca ta bay amplia, lo tin mas espacio pa e studiantenan”, el a menciona.

Hoen-Daly a subraya cu importante ta cu Universidad no solamente ta percura pa nan programanan ta actualiza, cu ta locual veld ta rekeri, pero tambe riba e bienestar di e studiantenan Universidad ta enfoca.

“Pues nos tin un programa basta amplio di shock awareness unda nos ta bay wak e estado mental di nos studiantenan, pasobra nos tur sa cu despues di Covid-19 hopi cos a cambia; pero nos hobennan tambe mester di yudanza.  Anto e parti di shock awareness a wordo amplia, e parti unda e studiantenan por studia mas largo na U.A, e parti unda e programanan a cambia, nan curriculum, pasobra simplemente veld ta pidi, pero tambe nos kier keda den e aspecto di globalizacion”, el a indica.

Hoen-Daly a agrega cu banda di e Bachelor Programa U.A tin e “Center for life long learning” cu a amplia su programa cu e coordinador nobo.

“Manera siman pasa nos tabata tin e conferencia cu mas di 80 temanan buscando solucionnan local, pa e problema di cambio di clima y sostenibilidad, y tambe nos research center cu lo wordo en cabesa cu Eric Mijts a cuminza florece, cu tur hende eyfo y nan kier sa unda Universidad por yuda, nos ta bay enfoca riba e parti ey”, Charisse Hoen-Daly a bisa.

“Nos ta enfocando no solamente riba scol, pasobra antes nos tabata bisa cu studiantenan di HAVO, VWO, Colegio EPI ta bon bini, nos kier e mayornan pero tambe e profesionalnan. Pasobra nos ta bay tin informacion di nos Master Programanan pero tambe nos por a ripara cu den Ley nan a cuminza un programa pa KPA. Pues nos a cuminza wak diferente negoshinan pa wak con nos por ofrece y hisa e calidad di educacion pa esun cu ta traha. Manera nos ta bisa ‘bini un bini tur’, studiantenan di Colegio EPI, di high schoolnan, pasobra awo kico Universidad ta ofrece, ta hopi mas y awo tur studiante for di derde Klas por bay studia na Hulanda tambe.

“Tur loke Universidad di Aruba a desaroya ta basa riba locual Aruba kier. Nos kier pa nos studiantenan keda akinan, nos kier aporta na comunidad y comercio”, Charisse Hoen-Daly a subraya.