SKOA a organiza su di seis Congreso pa Maestronan riba Dialuna cu a pasa

Asina SKOA ta inverti den su docentenan:

ORANJESTAD (AAN)—Director di SKOA, señora Anuesca Baly, den entrevista cu DIARIO a duna informacion tocante e di seis Congreso Nacional di Maestronan, cu a tuma lugar dialuna 30 di October ultimo, na Hilton Aruba Caribbean Resort.

SKOA ta organiza e Congreso aki pa su maestronan, unda cu nan ta bin hunto y ta haya diferente tayer di trabao y cursonan. Algun curso nan por a scoge y otronan ta obligatorio. E facilitadornan cu ta duna e cursonan ta bin di Hulanda, Belgica, hunto cu profesionalnan local cu tambe a duna curso.

“Locual SKOA kier saca for di dje ta inverti den nos docentenan. Nos no por inverti den un sentido di duna placa. Ora bo yega 38 aña bo tin un salario vast, pero esaki pa nos, dunando extra cursonan nos ta inverti den nos docentenan cu di nan banda ta bay inverti bek den nos alumnonan. P’esey pa nos ta hopi importante pa sigui recapacita nos docentenan unda cu nan ta duna bek den nos scolnan”, Director di SKOA a señala.