Mi Buki Mi Cas ta e cancion pa festival di Buki pa Mucha di e aña aki 

ORANJESTAD(AAN): Pa e festival di Buki pa Mucha e aña aki, Biblioteca Nacional a traha un cancion (‘Mi Buki Mi Cas’)

y un video clip y segun Alexis Tromp hefe di departamento di media di Biblioteca a indica cu a traha riba e diseño di e logo, cu ta hopi importante.

“Den e comision nos a dicidi riba e colornan di e logo y bo ta wak den e logo cu e muchanan tin un buki riba nan cabez cu ta forma un cas, segun Tromp.

El a sigui bisa cu na momento cu tabata pensando pa traha e video clip, e idea a bin dilanti pa haci esaki den e Biblioteca mes y esey a sosode.

E team a dicidi di traha e video clip den e biblioteca y segun Tromp esaki a bay na un manera hopi placentero.

E grupo di baile di Marcia de Jong di Prinses Amalia School a haci un tremendo trabao tambe manera semper, segun Tromp, kende a indica cu tabata bunita pa wak con e  muchanan tabata have fun.

E cancion di e festival, Mi Buki Mi Cas,  a wordo composita y skirbi pa Sergio Silva, Ambar Silva y Jeremy Bonariba y Reno Steba, mientras cu e areglo musical a wordo haci pa Sergio Silva, Reno Steba y Jeremy Bonariba.

E cancion a wordo canta pa Ambar Silva y esaki a wordo graba y mezcla pa Sunny Ray Studios.