Avance grandi anuncia cu ta cura Alzheimer

Un vacuna di 36 Florin por debolbe memoria di pashentnan

LONDRES: Cientificonan Britanico y Aleman, ta brazando otro cu un logro.  Nan a caba di bin cu un terapia pionero cu tin potencial pa revoluciona e tratamento y haci un cambio grandi den bida di hendenan cu ta sufriendo di Alzheimer, cu den boca di pueblo ta conoci como ‘verkalking’.

   Y e avance grandi cu nan a caba di logra pa trata Alzheimer, por reverse of hasta preveni e malesa aki... costando apenas 36 Florin pa un dosis di vacuna.

   Experimentonan haci riba raton a demostra cu e inyeccion ta restablece memoria door di destrui e proteinanan cora den cerebro, segun e corant Daily Mirror a raporta.

   Segun e investigadornan Britanico y Aleman, nan ta spera cu e testnan clinico di e tecnica aki, cu ta dirigi y enfoca riba fragmentonan soluble y hopi toxico di beta amiloide cu ta klomp na otro den plaque den bo cerebro, lo por cuminza den menos di 2 aña.

   Profesor Thomas Bayer di Gottingen University na Alemania, kende ta co-autor di e estudio a declara cu te cu recien, tur e centenares di testnan clinico haci rond mundo, ningun di e metodonan di tratamento di e malesa a wordo proba di tin hopi exito pa reduci sintomanan di Alzheimer.

   Algun di e testnan den pasado a hasta mustra di tin side-effects negativo.  Pesey awor e team aki a dicidi na un enfoque diferente.

   “Nos a identifica un anti-curpa den ratonnan cu ta neutraliza e ‘formanan trunca’ di beta amiloide soluble, pero no kier pega ni na e formanan normal di e proteina, ni na e plaquenan,” Profesor Bayer a indica.

   E ora e cientificonan a adapta e anti-curpa, cu ta ser yama TAP01, pa asina nos sistema di inmunidad no ta reconoce como algo stranhero.

   Pa nan sorpresa, e proteina e plega bek riba su mes.

   Den testnan haci, tanto e anti-curpa como tambe e vacuna diseña a drecha e funcion neuronal di e cerebro y a aumenta e metabolismo di e glucose den cerebro, debolbiendo memoria na e ratonnan.

   E co-autor Profesor Mark Carr di Leicester University, a bisa: “Si e resultadonan aki wordo reproduci den testnan cu humano, nan lo bay ta hopi transformativo.”

   “E ta habri e posibilidad pa no djis duna tratamento na Alzheimer, pero tambe sirbi como un vacuna potencial contra e malesa hasta prome cu bo haya sintomanan mes.”