Kizas tin di bay ofrece recompensa pa haya tip --- ORANJESTAD (AAN): Famianan ta kere firme cu el a wordo mata!
Amigonan cu conoce tambe hopi di cerca, ta comparti e mesun opinion. Y nan a hasta tene un conferencia di prensa pa roga tur hende cu a mira algo, pa bin dilanti y avisa na autorida kico a socede e Diadomingo anochi, 17 di October 2021 un poco prome cu 7:00 pm.
Tin varios persona cu a circula e informe cu un hende a pushe over di e muraya di parkinglot na halto, y a cay y dal masha duro na suela. Esaki ta net den e gang mas abao, meymey di e tiendanan di Beach ‘N’ Flips Aruba y Tommy Hilfiger den Paseo Herencia Mall na Palm Beach.
Personanan cu a core yega cerca, a bin topa cu e hoben Luis Angel Figueroa Flores benta eybao cu ta for di tino, pero ainda ta halando rosea. Mesora e hendenan aki a compronde cu e hoben a sali cay for di e muraya di un di e pisonan na halto. Paramediconan di e prome unidad di Ambulans cu a yega, a start inmediatamente practicando CPR como cu su pulso tabata instabil, y cu urgencia pa 7:35 pm a sali rumbo pa Hospital. Polisnan a yuda pa habri caminda pa e Ambulans por yega mas rapido posible.
Polisnan a cera parti di 3er piso y tambe parti di 2ndo piso pa no stroba e investigacion. Si ta for di Piso #3 el a cay, esey ta un haltura di como 10,5 meter.
Na Servicio di Emergencia na Hospital, a sigui traha cu e hoben aki na un forma mas tactico, mirando e hecho cu e lo tin hopi fractura interno. Nan a keda traha cune pa 3 ora largo pa salba su bida, y el a keda hala rosea. Pero pa 10:40 pm, Docter na Servicio di Emergencia a constata morto di e hoben di 20 aña.
Mientras tanto, e entiero ya a tuma lugar pero famianan keto bay a keda sin haya contesta. Enberdad a reuni cu Recherche y a haya algun detaye, pero nada di informe concreto ta kico a pasa. Nan a keda desapunta cu no tabatin ningun security camera den e Parkinglot di e Mall.
Luis Angel Figueroa Flores, conoci como DJ Louisville, a caba di toca e ora ey na YOLO cu ta un negoshi den The Cove Mall. Security camera di e Mall ey si a mustra con e hoben na final di su trabao a sali trankil y bay. Esey a descarta pues e teoria cu e hoben a wordo “persigui” door di otro hende eynan.
Autoridad a keda di busca cualkier imagen di Security Video cu lo por tin na tiendanan den e area, pa asina analiza nan y mira si por detecta algo mas.
Hasta Ministro di Husticia a expresa su mes riba e caso aki, y a ofrece e informe cu Recherche ta trahando riba e caso aki.
Hecho si ta cu e fayecimento di Luis Angel a laga un tristeza inmenso cerca amigo- y principalmente famianan. Conoci como un ‘mucha di cas’, e no ta envolvi den ningun vicio y ta gusta entretene hende, crea memes pa social media, y tambe pone hende hari.
HUSTICIA PA DJ LOUISVILLE: For di como 9 aña di edad, su mama y ruman muher a cumpli cu su deseo y a regal’e un Equipo Basico di DJ. For di e tempo ey el a cuminza mezcla cancion, haya sa con pa crea su mesun bootleg, scucha famoso DJ ta mezcla y e tabata purba imita.
Resultado di esey ta cu for di trempan el a sa di domina e arte aki di Discjockey. El a escoge e nomber artistico di ‘DJ Louisville’ y cu su animo y perseverancia el a cuminza haya contract pa toca na diferente lugar, e.o. na algun boda, tambe na Fiesta di Prom, a yega di toca tambe na Emotions Nightclub, na Craft, tambe na YOLO, Chupitoz, Sand Aruba, y na diferente ocasion ta yuda esnan di Elite Productions. Cu su edad hoben e tabata un Guest DJ tambe durante programa di DJ 101 na Cool FM. Un di su gran logro tabata cu el a wordo invita pa bay toca na Curaçao, y tabata na Club27. Como guest DJ, el a sa di haci su best aya. Algo grandi ta cu recien el a caba di firma contract tambe pa e bay toca como DJ na Merca.
Luis Angel tabata amigo di tur hende! E no tin enemigo pasobra e ta un persona hopi social y keri.
Un grupo local cu yama “Venezolanos en Aruba”, a lanza un campaña cu nan ta yama ‘Husticia para DJ Louisville”, pasobra nan kier pa e famia di algun forma mitiga nan dolor door di haya sa kico a socede, con el a cay di halto, y pa esnan responsable wordo deteni.
Awor despues di 30 dia ainda Aruba no tin contesta. Corda cu no ta un cacho a wordo mata aki, sino un persona hopi noble, habil, familiar, cariñoso y feliz, hopi exitoso den su trabao. El a logr’e honestamente cu empeño y dedicacion y cu edad hoben a logra realiza su soño, te ora cu un persona sin alma a corta su bida y di su famia.
E persona responsable tin di paga! Husticia mester yega y soluciona e caso.
KIZAS RECOMPENSA: Recientemente DIARIO a ricibi comentario di un lector, kende a puntra di con ni Ministerio Publico of Gobierno no a ofrece un recompensa grandi, pa e persona cu por duna e ‘Tip di Oro’ cu por yuda soluciona e morto di e hoben DJ aki.
Mester tin mas cu un hende eyfo cu sa kico a socede! Mester tin mas hende eyfo cu kizas no kier ta ‘metiche’ of basha abo. Pero si acaso bo pone un recompensa di kizas 5.000 Florin y bo ta keda anonimo, e lo por yuda autoridad haya e detaye ey cu falta.
Ni Ministerio Publico, ni Cuerpo Policial no a duna declaracion mas di e asunto aki, mucho menos informe di resultado di e autopsia. E speranza tey cu nan lo ta haciendo nan trabao, pero si acaso nan mes no ta ni manda nota y suplica pueblo pa yama Tipline, e ora ta kende tin di haci’e anto?
DIARIO si ta duna un man, y suplica tur hende cu por tin detaye di e asesinato aki, pa por fabor yama Tipline na 111-41, y corda cu Polis ta garantiza cu bo ta keda anonimo.
Ban yuda e famianan aki haya e trankilidad cu nan merece, y cu Husticia por pone man riba esnan culpable.
