"Cuido paliativo no ta cuminsa ora bo ta casi bay muri"

Benita Britt-Croes:  --- ORANJESTAD (AAN):  Ora ta toca e tema di cuidonan paliativo ta bin den mente e pregunta, con frecuente e necesidad di un hospice ta na Aruba?

      Benita Britt-Croes, Presidente di Fundacion Hospice Atardi a laga sa durante un entrevista cu DIARIO cu frecuentemente nan ta haya peticion for di hospital, pero tambe via dokter di cas y tin biaha via personanan envolvi den e cuido di un persona cu un malesa den fase terminal.  Covid a haci si cu e hospice a pasa un temporada cu menos peticion, entre otro tambe pasobra tabata tin hopi hende cu por a keda cas y asina famia mes a cuida nan ser keri. Awor nan ta ripara cu mas peticion ta drenta, y nan ta cla pa crece y tuma mas hende.

      El a remarca cu cuido paliativo no ta cuminsa ora bo ta casi bay muri. Cuido paliativo ta e cuido pa e persona y su famia ora ta enfrenta un malesa serio cu lo por causa morto, esaki por ta cancer pero tambe ora bo ta den fase terminal di malesa di curason y rinon por ehempel.  Y hopi trempan por cuminsa pensa riba kico ta importante, tuma decision tocante tratamento, cuminsa pensa con lo haci si e situacion bira mas serio. "Nos tur lo muri, y si nos tur cuminsa cu acepta esey y papia abiertamente riba esey lo kita un peso pa esnan cu ta keda atras", Benita Britt-Croes a expresa.

      Hospice atardi ta celebra awe 16 di November, nan di tres aniversario.  Kico ta nan vision pa futuro?  "Covid a frena nos un temporada, pero awor nos ta cla pa sigui crece, nos team di profesional y boluntario ta solido. Tambe nos kier contribui na cuido paliativo no solamente na Hospice pero comparti cu otronan cu tambe ta haci e trabou importante aki. Nos a cuminsa cu un curso pa comparti informacion y experiencia cu coleganan den otro organisacion na Aruba, y nos kier intercambia, pasobra anos tambe por siña di nan".  Benita Britt-Croes finalmente a expresa palabranan di danki pa e oportunidad cu nan a haya pa comparti algo over di Hospice y cuido paliativo en general na Aruba.