____Special ____
Pa Yorleny Oduber / Periodista
Den temponan moderno nos ta wak cu tin hopi desinformacion of noticia falso ta circulando den diferente plataforma di comunicacion. Akinan ta bin na remarca e concepto 'fake news' cu ta referi na noticianan falso cu generalmente ta circula por medio di internet, specialmente riba e rednan social. Pero, kico ta realmente "fake news"?
"Fake news" ta informacion falso cu generalmente ta sigui un agenda politico of social y ta diseña pa manipula e pensamento di e publico. E noticia por ta distorciona pa haci un hende kere den dje manera esaki ta real, pero sin ningun base veridico. Internet hunto cu e rednan social ta keda un luga caminda e sorto di informacion aki ta keda plama rapidamente, y e peliger di esaki ta cu hende por cay den un lama di desinformacion.
Un di e peligernan di mas grandi di "fake news" ta cu e por crea panico, desconfiansa, y incluso division den comunidad. Ora cu hende ta crea of ta difundi noticia falso, ta poniendo na peliger integridad di e sociedad, y ta haciendo mas facil pa manipula opinion publico.
No ta facil pa haci un diferencia entre loke ta real y loke ta falso, pero tin varios manera pa evita cay den trampa. Un di e prome pasonan ta semper verifica e fuente di e noticia. Si no tin claridad riba ken ta publica e noticia, si no tin fuente confiabel of si no tin evidencia, por ta un señal di alerta. Tambe, si e noticia ta apela mas na un sentimento di rabia, miedo of odio, esaki ta un otro indicacion cu loke ta wordo presenta por no ta veridico.
Esaki no ta solamente un problema na nivel global. Na Aruba tambe ta importante pa tene cuidao cu loke ta circula a traves di mensahenan, gruponan de WhatsApp, Facebook (cu ta hopi uza na Aruba) of hasta den forumnan local. Cada bes cu ta difundi "fake news", ta contribui na fenomeno peligroso aki.
Ta fundamental pa nos educa nos mes, como ciudadanonan, pa reconoce 'fake news' y siña verifica loke nos ta lesa. Un pueblo informa y critico ta un pueblo mas educa. P'esey esaki ta un invitacion pa cada un di nos tuma responsabilidad y siña pensa dos biaha prome cu comparti informacion sin verifica si ta trata di 'fake news' procedente di un fuente no verificabel.
Siguientemente ta comparti algun tips pa combati desinformacion di Fundacion Gabo (Gabriel Garcia Marquez), un instituto cu tin como meta fomenta un miho periodismo y ciudadanonan miho informa:
-Analisa e informacion: examina e contenido detayadamente.
-Separa e informacion den partinan pa establece kico por ta berdad y kico por ta falso: ta yuda evalua e veracidad di un hecho di manera independiente.
-Uza hermentnan di verificacion: esaki por inclui basenan di dato di hechonan verificabel, websitenan di verificacion, comparacion di imagennan, entre otro.
-Busca e contexto: esaki ta inclui investiga cualkier informacion adicional cu por proporciona un comprension mas completo di e situacion.
Aruba ta un isla chikito y nos ta hopi vulnerabel na e tipo di problematica aki. Sinembargo, ta importante reforsa e parti di educa comunidad pa siña identifica e sorto di informacion falso aki cu hopi biaha ta disfrasa di noticia.
Te un otro biaha cu mas informacion tocante e temanan importante aki.
