Auto a dal palo di luz y laga area grandi sin Internet

Dialuna marduga

ORANJESTAD (AAN): Dialuna a habri cu un cantidad grandi di ciudadano den area di Cumana cu Morgenster a bin ripara cu nan no tin Internet na cas.  Nada di CableNet, y ningun canal di CableTV ta aparece, y tampoco esnan cu ta mira via Setar su IPTV.

   A resulta cu den oranan di marduga, un auto color bayendo riba caminda di Playa pa Santa Cruz, na altura di Cumana a dal den un palo di luz, ranca e palo completo, y esaki a causa daño extenso na e Fiber Network di Setar NV.

   E daño a pone cu diferente bario a keda di marduga sin servicio di data y TV.

   Desde oranan trempan di mainta, Setar a manda un team di tecnico na e lugar, trahando duro pa restaura e servicionan bek den tur barionan afecta.  Mester a warda NV Elmar keda cla prome cu ponemento di un palo nobo.  Despues a sigui cu e trabao di drecha Fiber Optic.  Esaki a inclui e trabao delicado di ‘Fiber Optic Welding’ y Setar tin un setup special pa haci esey den nan vehiculo.

   Banda di 12:30 pm di Dialuna, Setar a cuminza suministra clientenan bek cu Data y TV.   Ya pa 2:00 pm, ta casi tur nan cliente tabata bek online.

   Setar NV ta gradici e team completo di Outside Plant Operations, pa nan input y experticio den e problema aki, cu a rekeri trabao di tur hende.

   E auto mes cu a dal den e palo di luz, a sigui core.  E chauffeur no a ni para pa asumi su responsabilidad como adulto.