Minister Geoffrey Wever: Utvoeringsrapportage entrega na tempo na CAft segun ley
ORANJESTAD (AAN): Durante su conferencia di prensa semanal Minister di Finansa Geoffrey Wever a elabora riba ehecucion di e presupuesto 2025 pa e periodo di januari pa juni 2025.
Cifranan pa e prome mitar di aña di 2025 ta mustra cu a ricibi 56% di entradanan presupuesta. Gastonan haci te cu juni 2025 ta na un nivel di 46% di loke a wordo presupuesta. E crecemento di economia den e prome seis lunanan di 2025 a conduci na mas entrada di bbo y invoerrechten. Ambos ta indicadornan pa crecemento economico, mas consumo y mas inversion. E resultado preliminario ta cumpli cu e normanan di presupuesto manera ancra den ley.
Departamento di Finansa cada kwartal ta compila e “UItvoeringsrapportage” basa riba cifranan preliminario di e administracion central di Pais Aruba y cifranan ricibi di entidadnan manera AZV, SVB, ATA, Serlimar, Stichting EPB y Universidad di Aruba cu ta forma parti di e sector colectivo.
Di januari pa juni 2025, Aruba a ricibi 1.032 miyon florin na entrada cu ta 56% di e presupuesto 2025. Un total di 812 miyon florin ta e gastonan di Pais Aruba cu ta ekivalente na 46% di total di gasto riba presupuesto 2025. Aruba a paga 241 miyon na debe y un total di 122 miyon florin na interes den e periodo di januari pa juni 2025.
Di e total na entrada, 417 miyon ta relata na Belasting Directo (40%), 440 miyon ta relata na Belasting Indirecto (43%) y e resto na diferente otro tipo di entrada. Pa loke ta trata Belasting Indirecto, den e di dos kwartaal di 2025 a ricibi 34 miyon mas compara cu 2024.
Pa loke ta trata belasting indirecto manera entre otro BBO y invoerrechten den e prome dos kwartaal di 2025 a ricibi un total di 334 miyon florin. Esaki ta 29 miyon florin mas compara cu e mesun periodo di 2024 den cual a ricibi 305 miyon florin. Motibo di esaki ta e desaroyo positivo di Aruba su economia.
Entrada pa AZV, ATA y SVb ta mustra un crecemento di 523 miyon florin den e prome dos kwartaal di 2024 pa 556 miyon florin den e prome dos kwartaal di 2025. E subida di33 miyon florin ta e resultado di e crecemento positivo di Aruba su economia.
Den e prome dos kwartaal di 2025, a realisa un totaal di 797 miyon na gasto operacional. Di esaki, 258 miyon florin ta trata di entre otro gastonan di personal cu ta igual na 51% di e gastonan total riba presupuesto 2025 (509 miyon), 92 miyon na Goederen en Diensten cu ta igual na 48% di e gastonan total riba presupuesto 2025 (193 miyon) y 122 miyon na interes paga riba debenan di Pais Aruba cu ta igual na 41% di e gastonan total na interes riba presupuesto 2025 (294 miyon).
Manera ancra den ley, College Aruba Financieel Toezicht (CAft) mester haya e “uitvoeringsrapportage” den un termino di 6 siman. Minister di Finansa Geoffrey Wever ta anuncia cu Gobierno di Aruba a cumpli cu ley y a entrega e uitvoertingsrapportage pa kwartaal 2 di 2025 na tempo. E resultado preliminario pa e prome mitar di aña ta uno positivo den cual Pais Aruba ta riba e caminda pa sigui cumpli cu e normanan di presupuesto manera ancra den ley.
Minister Geoffrey Wever ta gradici Departamento di Finansa pa e trabao di traha e uitvoeringsrapportage y entrega esaki manera ley ta bisa, na tempo na CAft. Manera ja caba ta conoci e presupuesto 2025 a wordo aproba unanimamente pa Parlamento di Aruba. Den cuadro di transparencia y informacion. Parlamento di Aruba tambe a ricibi e uitvoeringsrapportahe kwartaal 2 di 2025.
