Auto a dal cu impacto feroz contra cura di cas y mata tur dos ocupante

Diadomingo madruga na Catiri - ORANJESTAD (AAN): E sonido tabata fuerte!  El a lanta casi tur hende den e bario fo’i soño.

   Tabata Diadomingo madruga un tiki despues di 3:30 am cu un Toyota Yaris tipo sedan color cora cu number A-36196 ta moviendo di rotonde di Tanki Leendert direccion panort pa Moko y Calabas.   Net na e famoso birada di Catiri pa bay Soledad, na altura di e Piedra Grandi, e chauffeur a cuminza perde control riba su stuur.  Debi na velocidad halto, como 35 meter despues posiblemente el a ‘over-steer’ e vehiculo y a baha di caminda na su man drechi, dal den par di piedra y baranca cu tin eynan banda pariba.  E piedranan aki ta pariba otro banda di caminda di na altura mas o menos di cas Catiri 57 net na e T-weg.

   Despues di e impacto contra e piedranan, e auto den su momentum a subi bek riba caminda sinembargo aki el a bay den un scual, y moviendo di banda el a baha caminda na su man robez e biaha aki, y cu velocidad a keda slide y lastra como 47 meter, pasa dilanti un oficina di Lotto, y bay pega banda pazuid di e cas di famia na Catiri 61-E, mey-mey di dos pilar grandi cu ta wanta e porta di garage.  Esey ta exactamente 9,5 meter pabao di caminda grandi.

   E impacto a dobla e vehiculo na un forma di forza maximo, y aki kizas tur dos ocupante a bay dal cu nan curpa den e cura di beton of e body di e vehiculo, y a keda malamente herida eynan.

   Pues e auto aki a perde control y pa un total di como 82 meter largo a bay for di ora e chauffeur lo a perde control te ora cu el a impacta contra e muraya.

   Vocero Policial Lito Lacle, a indica cu pa 3:35 am Central di Polis a worde notifica di e accidente aki, y unidad di Polis a ser manda cu urgencia debi cu ta hopi yamada a cuminza drenta tras di otro.

   Tanto Polis y Ambulans a yega na e lugar, pero ora cu paramediconan a bay check e estado di e dos ocupantenan, a mira cu ya nan no ta duna ningun señal vital mas.  Paramediconan a informa Polis cu tanto e chauffeur masculino, y e pasahero femenino.  Pesey a pidi pa busca Docter pa bin na e lugar.

   Centro di Alarma a logra haya contacto cu Docter, y pa 4:51 am, Dr. Texier a constata morto di tur dos persona cu tabata den e Toyota Yaris aki.

   Segun Vocero Policial, esnan cu a fayece ta e cabayero G.E. Ledezma Carruyo naci dia 26 November 1985 (35 aña) na Venezuela, y e dama I. Goicochea Angulo naci dia 5 Mei 2001 (20 aña) na Cuba.

   E dama Cubana ta cuña di e chauffeur, pues tin lazo familiar aki.  Tur dos persona a wordo describi di tin caracter hopi lief, bon hende, y sigur a bay lagando famia den tristeza enorme.  Di e forma aki, Aruba a yega na di 4 morto di trafico pa 2021.  Nan tambe a bira e promenan pa luna di Augustus.

   Specialista di Trafico y funcionarionan hudicial forensico di BFTO a yega na e lugar pa haci nan investigacion extenso, esta check e golpi prome na e piedra banda pariba di caminda, check e lastronan laga abao, y mira claramente con di banda e auto a bay dal cu tur su impacto riba e banda di pasahero contra e pilarnan di beton.

   Polis a tuma nota tambe cu e nummerplaat poni riba e Toyota Yaris ta uno di 2019, pues esun color oranje.

   Autoridad a pone seccion di Slachtofferhulp tambe na altura pa nan bay na e lugar pa brinda sosten na e famianan cu ta involucra den e accidente pisa aki.

   Un mensahe na tur chauffeur pa bay trankilo den trafico. Bo famia ta warda bo na cas.  Corda cu Unidad di Intensive Care na Hospital ta yen caba.

   Tuma nota cu ta Polis ta bay emiti un rapport final di e accident y e causa exacto, pues Polis di Trafico lo indica si e teorianan di observacion aki di dal riba piedra y despues di 47 meter dal den muraya di cas ta valido.

   DIARIO y Cuerpo Policial Aruba ta manda palabra di profundo condolencia na famia di e fayecido.