Den tempo di pandemia sigur Pueblo cu ta paga awa y coriente mester ta central - Segun tur regla e persona cu faya segun doño di trabou ta bay cas - Hopi placa Pueblo ta paga na gerentenan di Companianan di Estado
ORANJESTAD(AAN)- Empleo di tur persona na e Estado di Derecho, Aruba, ta mara na ley directamente of na acuerdonan legal. Un persona cu ta den servicio directo di Gobierno, ta mara na e leynan cu ta vigente pa empleadonan publico.
Un empleado publico ta wordo paga segun sistemanan cu a nace den un tempo colonial durante cual empleadonan publico sigur den e funcionnan mas importante, mester a cruza Oceano Atlantico.
Un empleado den sector priva ta wordo paga segun ley, cu un sueldo minimo y segun acuerdonan laboral colectivo of personal.
Na mitar caminda entre e dos sistemanan aki ta topa cu gerencia y personal di Companianan di Estado cu realmente no ta carni ni pisca pero tambe hopi caso ta den un posicion mas beneficioso cu e carni of e pisca, cu ta empleo den gobierno of empleo den sector priva.
Awe Aruba ta den un suspenso total pasobra Utilities Aruba, cu ta representa Aruba, a splica dos gerente di WEB, cu nan no ta honra condicionnan di trabou cu a wordo spera di nan.
Segun tur informacion cu DIARIO tin y cu DIARIO a publica, esaki ta central den un carta pa habri porta pa despedida si no bini cambio, cu dos gerente di WEB a ricibi di nan hefe.
Mescos cu tur trahador, nan mester defende nan mes enfrente nan hefe y pa mucho mas cu solamente e hecho, cu nan tin problema pa Eagle haya e derecho pa entrega gas na WEB.
Ta un lista largo di punto DIARIO na forma exclusivo a presenta na Pueblo di Aruba cu tin derecho di ricibi tur informacion cu ta mishi cu su placa.
Riba e lista di acusacion por mira cu segun Utilities, tabata tin fayo den e forma cu e gerentenan a atende cu asuntonan financiero di WEB, cu ta un compania elemental di Aruba y den cual Aruba a hinca hopi placa.
Gerencia di WEB no ta haci Pueblo di Aruba ningun fabor ora e traha pa Pueblo pasobra e ta ricibi bon pago, manera DIARIO claramente a duna prueba cu e lista di salarionan cu ta wordo paga na WEB.
Esaki ta nifica cu ta bon placa ta paga tur hende y si e representante di Gobierno ta di opinion cu e gerentenan no ta haci nan trabou mester bisa nan esaki.
E punto cu directamente DIARIO por presenta na publico como informacion ta loke ta trata Eagle, cu ta un oportunidad pa Pueblo di Aruba haya awa mas barata di un compania cu ta haci Aruba su centro distribuidor.
DIARIO a duna tur detaye di Eagle y loke su presencia ta nifica pa Aruba.
Si Gerencia di WEB tin motibo cu e no kier Eagle, e mester papia y splica Pueblo pakico Eagle no ta na interes di Aruba y por ehempel Gasunie, cu cual gerencia di WEB kier a yega na un acuerdo cu no a wordo concretisa, si segun nan ta bon pa Aruba.
Punto importante ta awor aki, cu segun loke DIARIO por a comprende tabata fayo di e gerentenan ta motibo pa nan enfrenta Utilities y asina nan posibel retiro.
Si nan a faya nan no merece ningun handshake ni di oro ni di plata.
DIARIO ta insisti pa Parlamento investiga tur loke a pasa den WEB for di 2012 ora un delegation di gobierno Mike Eman a cuminsa atende cu gas y WEB. DIARIO ta insisti pa pueblo di Aruba haya tur informacion relaciona cu Gasunie pero tambe di e cantidad di companianan cu mester a presenta nan oferta na 2017 segun e carta cu gerencia di WEB, hunto cu Utilities y Gasunie a manda pa ex Ministro Mike de Meza, cu tin mas cos pa bin splica Pueblo.
DIARIO ta sigui cu su investigacionnan di e rapport riba Refineria di Aruba, otro compania di Estado den cual tambe Ministro Mike de Meza tabata tin hopi pa splica Pueblo.
WEB ta un compania vital. Un compania di interes primordial y ta basta placa Aruba ta paga na personal.
Ta bira tempo pa revisa e “toko den toko” cu companianan di estado ta bira den gobernacion di Aruba, cu ta encera cu e pais y tur loke ta di e pais ta wordo maneha na interes di e pueblo di Aruba cu sigur den tempo di pandemia no por tin handshake ni di oro ni di plata.
