‘Autentico’ a pone Wilhelminastraat un biaha mas den spotlight

ORANJESTAD (AAN): Siman a habri, y Ministro Geoffrey Wever a expresa su satisfaccion y aprecio pa e trabao y

dedicacion di henter e team di Aruba Tourism Authority (ATA) pa un biaha mas organiza Autentico Aruba Culinary Festival exitoso.  Esaki tabata un evento cu ta celebra nos gastronomia, reuni nos comunidad y crea oportunidad pa empresarionan local.

   Ta especialmente satisfactorio pa mira con e area di Wilhelminastraat ta sirbi como escenario pa un actividad asina importante.

   Como Gobierno, nos a inverti den mehoracion di infrastructura di e area aki, y nos compromiso ta pa sigui cu e trabaonan di mehoracion. Nos kier crea un ambiente mas atractivo y accesibel, unda actividadnan culinario, turismo y comercio por sigui desaroya.

   Revitalisacion di Wilhelminastraat no ta solamente trata di mehora e infrastructura, sino tambe di crea mas oportunidad economico y duna mas bida na nos centro di ciudad.

   Por a mira e.o. Ministro Geoffrey Wever, Ministro Gerlien Croes, y Ministro Wendrick Cicilia ta pasa rond bishitando diferente booth e anochinan aki.

   Ministronan a felicita e team completo di ATA y tur e organizadornan, participante y empresario cu ta contribui na e festival aki. Door di colaboracion por sigui fortalece Autentico y crea mas oportunidad pa comunidad y economia local.