ORANJESTAD (AAN): Tabata e Fundacion Ultimo Deseo Aruba (FUDA) cu algun luna pasa a trece dilanti,
nan observacion cu tin hopi pashent cu ta hospitaliza debi cu nan tin di haya infuus pa combati dolor... y cu tin hopi deseo di pasa nan ultimo dianan na cas hunto cu famia.
Pero a bin descubri, cu aunke na otro paisnan bo por haya infuus y pompnan portatil den cuido paliativo pa cana of bay cas cu nan... esey no ta posibel na Aruba.
E cuido paliativo ta un tipo di atencion medico specializa pa yuda combati dolor, of sintomanan y stress di hendenan cu ta sufri di malesanan grave. E meta ta pa mehora e calidad di bida di tanto e pashent como e famia.
Pero pa infuus y pompnan portatil pa morfina no ta disponibel pa pashentnan terminal na Aruba. A base di esaki, Fundacion FUDA hunto cu Docternan di Cas, Docternan Specialista, Boticario, Nurse, y demas profesionalnan di cuido a lanta un projectgroep pa asina check si por trece un miho cuido y mas humano pa pashentnan ricibi esaki na nan cas.
Dialuna mainta, Parlamentarionan di Aruba a ricibi presentacion di Fundacion Ultimo Deseo Aruba, particularmente e ‘Projectgroep Pijnbestrijding’ cu ta interesa pa duna a traves di Infuus den bo situacion na cas tratamento pa dolor na esnan cu tin mester di esaki den e fase final di bida.
Te cu awor esaki no ta posibel na Aruba y pesey e Fundacion ta sondea e posibilidad aki y a haci esaki conoci na Parlamento di Aruba.
