Atrobe Venezuela a persigui y ataca Go-Fast riba lama pazuid di Aruba

Un narcotraficante a perde su bida

• Atake a socede banda di Cabo San Román
• A lastra e boto casi full kima bek pa Venezuela 

ORANJESTAD (AAN): Apenas algun dia despues cu ya caba DIARIO a raporta di un caso caminda autoridadnan Venezolano a persigui y cu helicopter a los tiro pa stop un speedboat tipo Go-Fast riba lama dilanti estado Falcon, y cu lo tabatin 11 persona abordo.  Awor otro informe di persecusion y destruccion di un otro speedboat tipo Go-Fast.

   E caso di siman pasa no a duna ningun informacion extra si acaso a detene hende, of si e speedboat a fayece.

   Pero e siman aki, autoridad a divulga di un caso cu a socede den e anochi di Diamars 13 di Augustus 2024 pa Diaranson marduga riba lama panort Bajo Baroa cerca di Cabo San Román, na e parti mas panort di Peninsula di Paraguana na estado Falcon.  Cabo San Román ta situa apenas 28 km Zuidwest di San Nicola (Aruba).  Eynan atrobe autoridad Venezolano a detecta un speedboat tipo Go-Fast ta moviendo, y oficialnan a coordina pa nan bay su tras.  E speedboat tin 4 outboard engine potente.

   Banda di mey-anochi, cu unidadnan di patruyahe di vigilancia nocturno maritimo a drenta den accion, y a bay tras di e speedboat aki.  Autoridadnan di e pais bisiña a identifica e boto aki como ‘Tancol’, cu ta un palabra cu ta wordo usa pa narcotraficantenan Colombiano cu ta tratando di sembra teror riba teritorio Venezolano.

   Den e operacion aki, e oficialnan di Unidad de Reacción Rápida Marítima conoci como ‘Barracuda’, a purba di ordena e boto pa stop, pero esnan abordo no a responde riba esaki y a sigui move.  E ora francotiradornan Venezolano a mik cu nan arma riba e motornan pa desactiva nan.  Esaki a socede, pero lamentablemente proyectilnan a dal den e barinan di plastico yena cu gasolin, y esaki a pone e boto kima.

   Un narcotraficante abordo a perde su bida.  Aunke e candela a plama, toch autoridadnan Venezolano a logra colecta varios paki di marihuana, di cual algun tin cinta cruza di camuflahe blanco y preto, y tambe algun tin color blauw cla.  Na prome a kere cu ta como 600 paki di marihuana tin, pero despues di un conteo y listramento extra den e Go-Fast, e cifra total a yega na 1.663 paki di marihuana.  Mey-mey di nan a haya 23 paki tambe di cocaina.

   Den e operacion aki, autoridadnan di vigilancia di costa, tambe unidad di Guardia Nacional Bolivariana, y unidad di Puerto Escondido a yuda pa asina recoge pakinan di droga for di lama, y tambe yuda den investigacion forensico di e boto, cu ainda na candela a wordo lastra y treci na beach.

   Nan a keda encarga tambe pa saca e restonan mortal kima di e narcotraficante.