Frans Ponson, presidente:
ORANJESTAD (AAN) – Presidente di Comerciantenan Uni Aruba (CUA), Frans Ponson, a menciona den entrevista cu DIARIO, cu nan tin hopi miembro eenmanszaak, y cu e ta sigur cu 80% ta companianan chikito cu si ta paga inkomstenbelasting.
“Nos a bay confirma esaki pasobra nan ta bisa cu ta un problema, cu ta gobierno su fout. Comerciantenan a yama DIMP di biaha y a reuni cu ne di biaha puntr’e si esaki ta berdad”, Ponson a bisa.
DIMP a confirma CUA cu nunca nan a tende di e tema cu nan ta bisa cu ta un problema di gobierno cu nan no ta paga inkomstenbelasting pasobra ta nan deber di entrega nan papel y paga dicho impuesto.
Esey kiermen cu Servicio di Impuesto a confirma CUA cu di banda di gobierno no tin ningun problema y esey CUA ta lamenta ora cu publicamente, den bo derecho di bay dilanti bo ta bisa cu bo tin di 20 pa 25 aña cu ta atrasa den pago di belasting.
“Esey nos ta lamenta pasobra e ta trece problema den sector priva, pasobra tur trahador tin cu paga!”, Ponson a acentua y a reitera cu CUA kier confirmacion y splicacion di taxista, pasobra den nan vision, loke nan ta kere y e documento cu CUA ta wak, cu si Uber bin, claro cu no e prome luna pero pronto y cu tur hende ta cuminza pidie, e beneficionan ta ‘overweight’. “Ningun hende ta gusta cambio pero tin beneficionan. Si nos no ta cambia cu modernizacion nos ta keda atras como pueblo y como un pais y cu turismo cu ta e pilar di economia di nos pais”, Frans Ponson a remarca.
El a reitera cu na final di dia ora Uber ta drenta na vigor e taxistanan ta bay gana mas placa, pasobra ta bay tin hendenan constante na auto, nan lo no mester warda hopi, pueblo ta bay beneficia di esaki, nos lo por pidi Uber anochi, bo ta contribui mescos cu henter e pueblo ta haci, cu caha di belasting, y bo ta haci e servicio hopi mas safe riba caya pa tur hende cu ta core auto y cu a dal un par di drinks.
El reitera cu CUA tin entendi cu taxistanan no kier e app, pa un motibo cu e comerciantenan no ta compronde.
