Aruparking por genera hopi mas entrada si dun’e e tools cu e por funciona bon

Magaly Brito, Secretario General di SEPPA:

ORANJESTAD (AAN) – E dos companianan Arutram y Aruparking ta haya subsidio, cu ta bay den un solo pot pa Arubus. Asina e Secretario General di Sindicato di Empleadonan Publico y Priva (SEPPA), Magaly Brito, a señala den entrevista cu DIARIO.

            “Pero e fondo aki ta destina pa e maneho di Arutram y Aruparking. Di otro banda, Aruparking ta un compania cu por genera hopi mas entrada si dun’e e tools cu e por funciona, si cambia nos leynan cu por reinforza nan pa nan haci un trabao cu por genera entrada”, Magaly Brito a comenta.

No obstante, esey ta algo cu no ta sosodiendo; cada rato tin promesa, cada rato ta bisa esey ta bisa esaki, pero na final tempo ta bula y nada ta pasando.

            “Alomenos si esey ta wordo regla e ta genera entrada y, pakico no? E por yuda e otro tambe. Pero nada ta sosodiendo. Pa loke ta trata Arutram, e idea original su tras  tabata un acuerdo cu e minister di turismo, di tal manera cu cierto “x” suma ta bin pa yuda Arutram, pasobra nan ta duna un servicio na nos turistanan tambe. Pero den esey tambe, nada ta wordo haci. Tur hende kier tene e fondo pa nan mes y no ta wak ‘e picture’ den su totalidad, manera un ta yuda e man di otro y nos ta bay dilanti” Magaly Brito a señala.

            Brito a duna di conoce cu SEPPA a acerca e minister, pero ainda no tin contesta riba esaki y ta un lastima.

            “Nos ta pensa cu aworaki nos no ta haya e diferente hendenan, pasobra tur hende ta bay cu vakantie, y esey ta un hecho. Di otro banda, nos a tuma nota cu tin diferencianan di opinion riba e nombramento of e ponemento di un persona como director na e momentonan aki, y nos ta spera cu e ora ey e ta un problema resolvi. No tin mucho claridad cerca nos tampoco, rond di esey, pero cu e minister lo sa di cumpli su palabra cu ora cu tin e persona eynan, e partidonan ta bay bek na mesa y busca solucionnan”, Brito a indica.