Atrobe a cera e caminda cu tin patras di Departamento di Impuesto  

 ORANJESTAD (AAN): Aunke tin un duiker traha eynan, toch un biaha mas e mas di 13 mm di awacero cu a cay na Aruba riba Diamars mainta a pone cu un biaha mas un seccion di Rumbastraat a bay bao awa.

   Esaki ta e caminda cu tin net patras di Edificio di Belfin na Departamento di Impuesto, pues net pabao di AZV.

   Ta comosifuera cu e area aki den pasado tabata un dam!  E lugar a yena cu awa y como cu e awa ta color di lodo, chauffeurnan no por mira bon ta unda e caminda ta pasa.

   Polis cu a yega eynan, a considera e pida caminda aki como no-sigur pa trafico, y a pidi personal di DOW pa yega eynan cu baricada pa asina cera e pida caminda.

   E trahadornan balente di DOW a yega den un rato, y a cera e caminda.  Pero prome cu esey, ya caba un automobilista a confronta problema ora di pasa eynan.