Minister Presidente ta desmenti tur speculacion:
ORANJESTAD (AAN) – Minister Presidente Evelyn Wever-Croes y Formador, a hiba palabra den conferencia di prensa, unda a duna un actualisacion di e proceso di formacion di un gobierno nobo pa Aruba, ya dos luna despues cu eleccion a tuma lugar.
Minister Presidente a expresa cu e proceso di formacion ta bayendo hopi bon, na e velocidad cu a premira.
Manera ta conoci e acuerdo di gobernacion entre Partido MEP y RAIZ a keda firma siman pasa, den cual den lineanan grandi tin e principal puntonan di enfoke den e periodo nos dilanti. E dignatario a duna di conoce cu aworaki nan ta bezig cu e reparticion di cartera entre e partidonan MEP y RAIZ, y ora tin defini cual ministerio ta bay pa MEP y cual pa RAIZ, lo sigui cu e candidatonan cu ta wordo proponi pa ocupa e ministerionan concerni.
E mandatario a expresa cu na e momentonan aki, esaki ta e ultimo status update.
E dignatario a tuma nota cu tin hopi speculacion andando y mal informacion cu ta wordo duna, tocante ken a pasa screening y ken no, siendo cu nan no tey eynan ainda. “Nos ta trahando riba tur loke mester wordo haci, y e ta un trabao cu ta tuma tempo; un trabao cu mi kier hacie hopi na serio, pa asina, sigur ora nos presenta e candidatonan pa minister y e reparticion di cartera y ministerionan, ta e miho interes di Aruba ta wordo sirbi. Kiermen, di aki mi kier bisa tur hende duna mi un chens. Nos ta kedando cla si pero ainda nos no ta cla. speculacionnan di ken a pasa screening y ken no, ningun ta berdad. Nos no ta eynan ainda. Dus bay keda trankil, Aruba pronto lo haya su gobierno manera cu pueblo a pidi, dia 25 di Juni”, Minister Presidente-Formador, a remarca.
Aworaki, e mandatario a indica, ta continuando cu e sesionnan cu stakeholders, y hopi hende ta puntre si nan a firma e Acuerdo di Gobernacion caba, di con ainda ta sigui cu e reunionnan aki.
“Pasobra e acuerdo ta den lineanan grandi, y nos a palabra cu dia 31 di October venidero, cada minister lo duna su parti pa nos tin un programa di gobernacion, cu ta bay mas den extenso riba diferente punto. Pesey e stakeholders sessions aki ta keda importante pa ora nos traha nos programa” e mandatario a señala.
