Franchesca Heinze:
ORANJESTAD (AAN): Dia Internacional di Mucha a wordo celebra pa diferente organisacionnan y fundacionnan na grandi. Scolnan tambe a participa na actividadnan dirigi na derercho y debernan di mucha.
Asociacion Trabou di Hubentud na Aruba (ATHA) kier yuda mucha y hoben conoce, compronde y eherce nan derechonan. Riba 20 di november, riba Dia Internacional di Derecho di Mucha, ATHA a lansa oficialmente su Tienda di Derecho di Mucha y a presenta oficialmente mascota LIO, cu ta representa e cododo di Aruba.
E lanzamento a forma parti di e celebracion di e dia. Cu e Tienda, ATHA kier promove y proteha e derechonan di tur mucha y hoben na Aruba.
Directora di ATHA, Franchesca Heinze, a splica cu LIO lo bishita scolnan pa papia cu muchanan tocante nan derechonan y con nan por practica nan debernan den bida diario. ATHA lo desaroya material educativo adapta na edad di e muchanan, pa trata e temanan aki di un manera creativo y facil pa compronde.
LIO ta e prome di un grupo di mascota cu ATHA lo introduci proximamente. Segun Heinze, su papel ta pa anima muchanan pa purba cos nobo, siña di nan erornan y persevera den loke nan kier logra. E otro mascotanan tambe lo uni na LIO pronto pa hunto trata temanan manera cordialidad y respet, cu ehempelnan di bida diario, manera saluda otro cu un bon dia, bon tardi of bon nochi.
E iniciativa ta inclui tambe orientacion pa mayornan y organisacionnan cu ta traha cu mucha y hoben. Asina, ATHA kier involucra e adultonan cu tin un rol den crea un ambiente unda cada mucha por crece sigur, expresa su opinion y por crece cu respet y proteccion.
https://diario.aw/categories/noticia/general/atha-ta-lansa-tienda-di-derecho-di-mucha-y-a-presenta-su-mascota-lio-oficialmente#sigProId750bae388f