Jeanine Tromp:
ORANJESTAD (AAN)-- CEDEHM (Centro di Desaroyo di Hende Muhe) ta orguyoso di forma parti di e Campaña Internacional “Orange the World”, hunto cu e Departamento di Asunto Social, entre otro, pa crea concientizacion y preveni violencia contra hende muhe adulto y mucha muhe. Asina Jeanine Tromp, Trahado Social di Cedehm a indica, den entrevista cu DIARIO.
“Pa nos contribucion cu esaki CEDEHM ta bay ta organizando un simposio cu ta bay ta specialmente pa tur nos profesionalnan, cu ta traha cu victima di violencia. Nan ta bay ta presente den e simposio aki. Esaki lo tuma lugar dia 9 di December, di 9’or pa 1’or, na JFK Education Center. E ta dirigi na un grupo specifico cu ta bay haya invitacion personal pa atende e simposio aki”, Jeanine Tromp a menciona.
Tromp a sigui splica cu e tema di e simposio aki ta “Dare to Talk Hardcode” unda cu ta bay papia hopi tocante e hecho cu desigualdad di genero ta conduci na violencia inter-familiar, y e factor di riesgo di e comportacion di e agresor.
“Akinan nos ta bay tin algun profesional cu ta bay sinta hunto den un panel, y papia over di e violencia di genero inter-familiar, y kico por bay ta e comportacion di e agresor. E ta bay ta un simposio hopi interesante y importante, principalmente pa e profesionalnan cu lo bay atende esaki”, Jeanine Tromp a remarca.
“CEDEHM ta hopi contento di forma parti di e campaña di concientizacion, pasobra nos ta para pa e derecho di hende muhe, y pa yuda tur nos hendenan muhe eyfo”, Jeanine Tromp a comenta. El a agrega cu Cedehm tambe ta haya hendenan muhe cu ta pasa den relacion violento, y tambe e ta forma parti di e Departamento di Asuntonan di Hende Muhe unda nan tin un policy habri, unda cu hende muhe por yega papia cu e trahadornan di locual nan ta pasando aden.