ATA y COA a firma acuerdo pa uni den un Asociacion formal

CEO di ATA Ronella Croes ta splica:

ORANJESTAD (AAN) – CEO di Aruba Tourism Authority (ATA NV), Ronella Croes, a yama un conferencia di prensa, hunto cu señora Nicole Hoevertsz, Vicepresidente di e Comite Olimpico Internacional, relaciona cu un hecho sumamente special.

Ronella Croes a cuminza expresando cu September ta un luna extra special pa turismo, mirando cu otro siman ta wordo celebra e Dia Internacional di Turismo.

“Pues, no tin un momento mas oportuno, despues di hopi tempo di dialogo, entre ATA y Comite Olimpico Arubano (COA) cu pa nos a yega e momento di firma un acuerdo formal y drenta den un asociacion formal e ora ey cu Comite Olimpico Arubano”, Ronella Croes a duna di conoce.

E dama a subraya cu no ta un secreto cu un di e maneranan di  promove Aruba ta pa medio di deporte, pero sigur ora di mira e area di deporte cu ta asina special pa nos comunidad, pero tambe pa turismo, tin hopi opcion y hopi peticion ta yega cerca ATA, pa contribucion.

“Y ta un reto sigur pa nos pa dicidi unda nos ta contribui y unda no. Kico ta e maneho pa cu contribucion, pero sin duda algun un di e maneranan cu nos por contribui na posesiona Aruba debidamente, ta pa medio di e Asociacion aki.

Di con? Pasobra nos tin aworaki nos atletanan cu ta wordo prepara pa competi internacionalmente, pero, evidentemente, na final esnan por ta logra bay riba e plataforma maximo di deporte, cu ta e Weganan Olimpico Mundial.

Pues, esaki ta e manera cu nos ta kere cu ta esun perfecto pa por duna nos contribucion tambe, nos granite, na deporte, na creacion di talentonan, y promocion di Aruba internacionalmente”, CEO di ATA a señala.

El a reitera cu e acuerdo aki a bin ta den preparacion pa hopi tempo. “Esnan presente aki tambe ta kere cu Asociacion no ta algo di un momento pero e ta pa un tempo largo, pues nos a delibera ta kico ta e miho manera y mi por bisa cu e rekisito den e acuerdo aki, ta cu e contribucion di Aruba Tourism Authority ta yuda cultiva e atletanan aki y prepara nan, pa asina nan por luci debidamente, internacionalmente”, Ronella Croes a subraya.

El a bisa, como anecdota, cu den pasado ATA a contribui tambe na un manera special, y esey ta pa medio di diseño di uniform, cu nos atletanan a luci na 2016 y ATA a contribui na duna su input y su opinion, pakico lo ta e ora ey un diseño cu lo a carga e nomber di Aruba debidamente.

“Sin kita tur e talento cu a bay den diseña esaki, ATA tabata tin su input den esaki, pues tabata un bunita colaboracion e ora ey”, Ronella Croes a reitera.

El a agrega cu durante añanan ATA a contribui cu diferente evento deportivo, na diferente manera, y el a reitera cu nan maneho aworaki ta inclui e asociacion aki.

“Y nos ta hopi orguyoso tambe di con e Comision aki, a bin ta carga tambe su responsabilidad; un partido hopi serio, nos por mira resultadonan tambe y diferente avance den e mundo deportivo, pues ta tambe un motibo pa ATA asocia su mes cu Comite Olimpico Arubano”, CEO di ATA y asina duna nos contribucion, Ronella Croes a expresa.