Den algun caso e gastonan a baha:
ORANJESTAD (AAN) – Minister di Finanzas y Cultura, den conferencia di prensa “Pago di overtime den Gobierno”, a sigui elabora tocante e reaccion di sindicatonan tocante e maneho nobo di overtime, cu Minister Presidente a anuncia siman pasa.
El a menciona tambe e Sindicato di Aduana, cu a trece dilanti cu ta iresponsable e manera con Minister Presidente a sali anuncia e circular. “Pero mester bisa cu no ta di awor, ya caba for di 2018 tin investigacion ta tumando lugar, pa locual ta gasto di personal. Instancianan local y tambe internacional a mustra riba e problematica aki, y sigur na Aduana a haci cambionan den e rooster y por mira cu e cambionan aki, hunto cu e disciplina cu a wordo presenta, por mira cu e gastonan di overtime a baha grandemente. Esaki ta mustra cu por haci menos gasto si tin un bon planning y disciplina y por mira cu den Cuerpo di Aduana, a logra haci esaki.
E mandatario a trece dilanti cu pesey Minister Rocco Tjon a sinta cu tur esnan riba tereno di husticia, pa asina aki por garantiza e seguridad di nos pais, pero haciendo e cambionan y contene e gastonan di overtime.
Minister Xiomara Maduro a haci uso di graficonan pa mustra na unda tin mas gasto overtime na Aruba, unda esun prome ta Cuerpo Policial.
Na 2017 e gasto na overtime pa KPA tabata 12 miyon florin, na 2018 tambe a paga 12 miyon, 2019 ta 13 miyon, 2020 ta 10 miyon y mescos na 2021, y pa 2022 ya caba gobierno a realiza 8 miyon florin.
E mandatario a reitera cu no ta asina cu gobierno no ta paga overtime pero a paga un promedio di 11 miyon cu ta bay solamente pa paga Cuerpo Policial. Pues di 20 pa 21 miyon pa aña cu tin presupuesta pa pago di overtime pa full gobierno, mitad di e placa ta bay pa por cumpli cu Cuerpo Policial.
E dignatario a menciona cu KIA tambe tin su gastonan di overtime: na 2017: 4 miyon, na 2018: 4 miyon, 2019: 4 miyon, 2020: 4 miyon, 2021: 3.7 miyon y 2022 te aworaki tin 2 miyon.
Na Brandweer tambe a paga 2 miyon na 2017, 2018: 2 miyon, 2019: 3 miyon, 2020: 2 miyon, 2021: 2 miyon y 2022 te aworaki tin 1.6 miyon realiza.
Cuerpo Special: 2017: 2 miyon, 2018: 2 miyon, 2019: 2 miyon, 2020: 1.4 miyon, 2021: 1.4 miyon. Na Cuerpo Special tambe nan a traha riba e rooster, pa asina aki el a resulta den un bahada di gasto. Na 2022 te aworaki, nan a realiza 903 mil florin na locual ta e gastonan di overtime.
Na IASA tambe di 2017 te 2019 nan tabata realiza 1 miyon na overtime, na 2020 el a keda reduci y na 2021, cu claramente ta e añanan di pandemia, pesey tin un bahada, pero por mira cu compara cu prome tin un reduccion den e cifranan aki.
Departamento di Aduana: na 2017 y 2018 tabata tin 1 miyon na gasto di overtime, y despues cu e cambionan a wordo introduci, na 2019 a baha bay na 642 mil florin, na 2020 a bira 423 mil, na 2021 ta bira 669 pasobra eynan tin e recuperacion caba, pero e ta mustra cu no ta mas un miyon. Pues, eynan tin cambionan cu a word haci, disciplina cu a wordo mustra, y eynan por wak cu por logra.
